Atyraý oblystyq polısıa departamentiniń basshysy A. Dúısembaev pen sol oblystaǵy qarjy polısıasy departamenti basshysynyń orynbasary Ýaısovqa qatysty ádepke jat qylyqtar jasaǵany úshin qatań shara qabyldaǵanyn kórip, Qyzylorda oblysy Jańaqorǵan aýdandyq máslıhatynyń depýtaty Turdaly Qaldybaev prezıdent Qasym-Jomart Toqaevqa hat joldady dep jazady Qamshy.kz aqparat agenttigi.
Ol týraly Turdaly Qaldybaev óziniń feısbýk paraqshasynda jarıalady. "Biraq, bizdiń aýdannyń ákimi Ámireevke eshkimniń shamasy kelmeıdi-aý?! Óıtkeni onyń Kósherbaevtaı kókesi bar", - delingen hatta.
Hat avtory aýdan ákimi Ǵalym Ámireevtiń ádiletsizdigin áshkereleıdi.
Qurmetti Qasym-Jomart Kemeluly!
Bizder, jańaqorǵandyqtar "Qazaqstanda zań joq" degen oıda júr edik. Alaıda Sizdiń memlekettik organdar basshylaryna halyqpen etene aralasý úshin áleýmettik jeliler arqyly halyqpen tikeleı baılanysýdy tapsyrǵan bastamańyzdy qýana qoldadyq. Áleýmettik jelidegi jazba negizinde Atyraý oblystyq Polısıa departamentiniń basshysy A. Dúısembaev pen sol oblystaǵy qarjy polısıasy departamenti basshysynyń orynbasary Ýaısovqa qatysty ádepke jat qylyqtar jasaǵany úshin qatal shara qabyldanǵanyn kórip, ár óńirlerde ózi bı, ózi qoja bolyp úırenip qalǵan sheneýnik-symaqtardy da tártipke salatyn adam bar eken-aý dep rıza bolyp qaldyq.
Biraq, bizdiń aýdannyń ákimi Ámireevke eshkimniń shamasy kelmeıdi-aý?! Óıtkeni onyń Kósherbaevtaı kókesi bar. Bulaı deýimizge sebep 2016 jyldan bastap aýdanymyzǵa ákim bolyp kelgen Ámireev oıyna kelgenin istep otyr. Memlekettik qyzmet isteri agenttiginiń basshysy halyqqa esep bergen kezde komandalyq aýys-túıisti toqtattyq dep jarıaǵa jar salady. Biraq bul zań da bizdiń ákimge arnalmaǵan. Óıtkeni aýdanǵa komandalas dostaryn ertip alyp keledi. (el aýzynda ákimniń kadr jónindegi orynbasary degen atpen tanys J.Dúısekeev aýdan ákiminiń bas ınspektory, A. Bekishev Jańaqorǵan kentiniń ákimi, shtattan tys kómekshisi, aýdan ákiminiń janyndaǵy qordyń qarjysyna ıelik etýshi B. Qızatov) Bulardyń barlyǵy qazirgi tańda sybaılas jemqorlyqtyń shyrmaýyna shatylyp isti bolyp jatyr. Bul aıtqandarym jalǵan bolatyn bolsa, oblystyq qarjy polısıasynan bilýge bolatyn shyǵar. (Bul azamattardyń aýdanda jasaǵan isterin jeke-jeke jiktep jazyp sizdiń ýaqytyńyzdy almaıyn. Ony búkil aýdan halqy biledi)
Aýdan ákiminiń kadr jónindegi orynbasary degen laqap aty bar, ózimen erip kelgen kómekshisi Dúısekeev «aýdan ákiminiń qamqorlyǵynda bolýy úshin» bólim basshylary men aýyl ákimderinen turaqty túrde qarjylaı jáne ózgedeı syıaqy alyp otyrǵan. Egerde aýdan ákiminiń yqpaly bolmasa, birneshe jyl qyzmet ótili men ómirlik tájirıbesi bar mekeme basshylary qarshadaı balanyń aıtqanyn istep, suraǵanyn bere beretindeı olardyń artyq dúnıeleri kóp pe eken? Búkil aýdannyń halqy biletin, tapsyrmalardyń barlyǵyn aýdan ákiminiń berip otyrǵanyn anyqtaýǵa quzyrly organdarǵa dálel jetpeı jatyr ma?. Álde dálel bolýy úshin aýdan ákimi jeke kómekshisine bergen tapsyrmalaryn mıkrofonmen jalpy jurttyń aldynda aıtýy kerek pe? Aýdan ákimimen táýliktiń 24 saǵatynda birge júretin (aýdan ákiminiń qyzmettik turǵyn úıinde de birge turatyn) eki jeke kómekshisimen oljaly jospar qurýy úshin, ońasha oryn jetedi emes pe?
Ámireev jeke kómekshilerin ákelgenimen qoımaı, kómekshisi J. Dúısekeevtiń áıeli jumys istemese de aýdandyq qarjy bólimi arqyly zańsyz eńbekaqy tólenip, sonyń negizinde negizsiz júktiligine baılanysty járdemaqy da taǵaıyndalyp otyr. Zańsyz eńbekaqy tólegen sol kezdegi qarjy bóliminiń basshysy A. Salybekovti "adal" berilgendigi úshin aýdan ákiminiń orynbasary etip taǵaıyndaǵan.
Aýdan ákimi men onyń seriktesteriniń kesirinen aýdandaǵy memlekettik organnyń basshylary quzyrly organdarǵa jaýap berip júrgen jaǵdaılary bar.
Bul jaǵdaılardyń barlyǵy jóninde qylmystyq is qozǵalmaı turyp, oblys ákimi Q. Kósherbaevqa aldyn-ala eskertilip, hat joldanǵan bolatyn.
Oblys ákimine eskertilip jazylǵan hatta atalǵan aýdan ákimi Ámireevke jeke basyna berilgendik qasıeti boıynsha baǵalanatyn "aýdandyq jumyspen qamtý jáne áleýmettik baǵdarlamalar bóliminiń basshysy H. Ahmetov te sybaılas jemqorlyqpen kúdikti retinde isti bolyp jatyr" dep estımiz.
Dál qazirgi kezeńde aýdanda qoǵamdyq-saıası ahýal tolqyp tur. Osyndaı saılaýaldy naýqan kezinde jergilikti atqarýshy organ tarapynan halyqtyń kóńilinen shyǵatyn saýatty qadamdar jasalmasa, jaǵdaı ýshyǵyp ketýi múmkin. Olaı deıtinim, qazirgi tańda Ámireevtiń ıdeologıa jónindegi aqylshy, keńesshisi, aýdandyq ishki saıasat bóliminiń basshysy Á. Tólegenovtiń jaı ǵana aýdan deńgeıinde ótkizilgen aýyl ákiminiń saılaýynda, aýdandyq maslıhat depýtattarynyń daýysyn belden basyp, qasaqana burmalap júrgendigin eskeretin bolsaq, aldaǵy úlken saılaý naýqanynda saýatsyz saıası qadamdar jasap, halyqtyń narazylyǵyn týdyrýy ábden múmkin.(Aýyl ákimderiniń saılaýy kezindegi qozǵalǵan qylmystyq is jáne depýtattardyń aktisi bar) Aýdandyq máslıhat depýtattarynyń osy máselege baılanysty aýdan ákimine jazǵan narazylyǵynan soń, Tólegenovtiń sol kezdegi saılaý komısıasy tóraǵalyǵynan bosatylyp, atqaryp otyrǵan qyzmetinen bosatý máselesi aýdan ákiminiń nazaryna alynǵandyǵy jóninde jaýap berilgen. (Hattyń kóshirmesi bar)
Ámireev úshin Tólegenovtiń aqyl keńesi altynnan da qymbat deýge bolady.Sebebi Ámireevtiń zańsyz bosatqan ıdeologıa jónindegi orynbasary Áıtbembettiń ornyna Tólegenovti ıdeologıa jónindegi orynbasary etip ákelýge Ámireev asa belsendilikpen jumys jasaýda. Olaı oılamaıyn deseń, bos orynǵa birneshe ret konkýrs ótkizgenimen eshkim qatyspaıdy. Qatysqan adam bas tartady. Sonda Ámireevtiń ol orynǵa mamandyǵy agronom bolsa da Tólegenovten basqa eshkimdi sáıkes kórmeýi qandaı zańǵa sáıkes keledi eken? Bos turǵan aýdan ákimi orynbasarynyń atqaratyn mindetinTólegenovtiń bilimine, mamandyǵyna sáıkestendirý úshin memlekettik qyzmet isteri departamentine ótinish jasaýda dep estımiz.
Osy jerde aıtarym, oblys ákiminiń apparaty men oblystyq memlekettik qyzmet departamenti bir jylǵa jýyq bos turǵan aýdan ákiminiń orynbasary laýazymynyń nege bos turǵandyǵynan habarsyz bolǵany ma? Bolmasa, eshkim zerdeleý jasamaıdy ma? Osyndaı naýqan ýaqytynda nege jylǵa jýyq ýaqyt bos turady?
Aýdanda bilikti maman sanalatyn burynǵy aýdandyq ekonomıka bóliminiń basshysy S. Asenovti de jumystan zańsyz bosatqandyǵy jóninde halyq arasynda ashyq aıtylyp júr.
Qazirgi tańda respýblıka deńgeıinde halyqtyń ál-aýqatyn arttyrý boıynsha keshendi sharalar qabyldanyp jatqan ýaqytta Qyzylorda oblysynyń halqy kóp shoǵyrlanǵan beldi aýdany, damý perspektıvasy bar Jańaqorǵan aýdanynyń ákimi aýdandy damytý úshin bilikti mamandardy jumyldyryp jumys jasaýdyń ornyna, ózine «adal» qyzmetkerleri sybaılas jemqorlyqqa shatylyp, al ózi bolsa qaramaǵyndaǵy qyzmetkerlerdi zańsyz qýdalap, sottasýda. Sonda deımin, ózge óńirlerde ákimder men mınıstrler halyqpen kezdesip, halyqtyń muń-muqtajyn tyńdap, ál-aýqatyn arttyrýǵa jumys jasap, bastaryn aýyrtyp jatsa, bizdiń aýdanda aýdan ákimi bastaǵan 10 – ǵa jýyq memlekettik qyzmetshiler sybaılas jemqorlyqqa shatylyp nemese óz-ózderimen aıtysyp, sottasyp jatyr.
Osy Ámireevtiń kesirinen kúdikke ilinip, shatylyp jatqan jáne zańsyz jumystan bosatylǵan qyzmetkerlerdiń artynda qanshama otbasy músheleri, aǵaıyn-týystary sary ýaıymǵa salynyp, narazy bolýda.
Qazaqta "et sasysa tuz sebemiz, tuz sasysa ne sebemiz?" degen sóz bar. Endeshe halyq úshin paıdasy joq, el-jurtty shýlatyp, halyqtyń bılikke degen renishin týǵyzatyn áreketterimen áshkere bolǵan Ámireev sıaqty ákimniń aýdan úshin qanshalyqty qajeti bar?
Qurmetti Qasym-Jomart Kemeluly!
Men bizdiń aýdanda bolyp jatqan keleńsizdikterdi jalpylama ǵana atap óttim. Munan ózge de ákimdik janynan qurylǵan qorǵa túsip, negizsiz jaratylǵan 54 mln teńge nemese jeke kásipkerdiń satyp paıda tabýy úshin jeke qarajatyna salǵan quny 400 mln teńgeden aspaıtyn kóp qabatty turǵyn úılerine memlekettik búdjetten úıdiń qunynan 3,5 ese kóp, ıaǵnı 1 mlrd 400 mln teńgege ınfraqurylym jetkizýdiń qanshalyqty qajettiligi jóninde jáne ózge de máseleler basy ashyq kúıinde qalyp otyr.
Sondyqtan ary qaraı óz tarapyńyzdan tıisti tapsyrmalar berip, qajetti sharalar qabyldanady dep senemiz.
