Óńirde 8 aımaqtyq saılaý komısıasy qurylyp, búgingi tańda 390 myńnan asa saılaýshy tirkelgen. Bul týraly óńirlik komýnıkasıalar qyzmeti alańynda ótken brıfıńte Mańǵystaý oblystyq saılaý komısıasynyń tóraǵasy Asqar Rzahanov málimdedi.
Bıylǵy jyldyń 9-maýsymynda kezekten tys QR prezıdentiniń saılaýy ótedi dep bekitildi. Osyǵan oraı, kúntizbelik jospar boıynsha 1 oblystyq, 5 aýdandyq, 2 qalalyq saılaý komısıalary júıeli túrde óz jumystaryn bastap ketti. Prezıdentikke kandıdattardy tirkeý, senimdi ókilderin taǵaıyndap, kýálikterin berý, saılaýshylardy tirkeý - zań talaptary boıynsha belgilengen kezeńde ótýi kerek. Búgingi tańda barlyq úmitkerlerdiń oblysta shtattary ashylyp, senimdi ókilderi tirkelgen. Atap aıtsaq: Qasym-Jomart Toqaevqa 619 senimdi ókil tirkelse, Amangeldi Taspıhovqa 47, Danıa Esbaevaǵa 228 ókil senim bildirse, Sádibek Túgelge 11, Tóleýtaı Rahymbekovke 11, 16 adam Jambyl Ahmetbekovke tirkelse, Ámirjan Qosanovqa 21 adam senimdi ókil bolýǵa nıet bildirgen.
Oblysta 223 ýchaskelik komısıa jumys istep jatyr. 25-mamyrdan bastap árbir saılaýshy ózine jaqyn saılaý ýchaskesine baryp, tizimge engen nemese enbegeni týraly aqparat ala alady. Egerde 9-maýsym kúni ártúrli sebeptermen turǵylyqty jerinde bolmaıtyn azamattar esepten shyǵarý kýáligin alýy kerek. Sol kýálikpen júrgen jerinde tirkelip, daýys bere alady. Vahtalyq ádiste qyzmet atqaratyn munaıshylardyń saılaýǵa qatysýy úshin tizimder jasaqtalyp, ken oryndarynda 5 saılaý ýchaskeleri ashylǵan. Sondaı-aq, múmkindigi shekteýli jandar úshin barlyq saılaý ýchaskelerinde arnaıy jaǵdaı jasalǵan. Estý qabileti tómen adamdarǵa qulaqqaptar, kózi kórmeıtin toptaǵylar úshin trafaretter ornatylǵan. Ártúrli erekshelikterge arnaıy jasaqtalǵan ýchaskelerde 8000 ǵa jýyq saılaýshy daýys bere alady.
«Oblystyq saılaý komısıasy kúni búginge deıin aýdan-qalalardy aralap keldik. Saılaýǵa tyńǵylyqty daıyndyq júrgizilip, pysyqtalýda. Óńirge uzaq merzimge halyqaralyq deńgeıdegi baqylaýshylar keldi. Onyń biri Amerıka qurama shtattarynan bolsa, ekinshisi Reseıden kelip, jumystaryn atqarýda. Saılaý kúni jaqyndaǵan saıyn baqylaýshylar tizimi ósedi» - dedi MO saılaý komısıasy tóraǵasynyń orynbasary Isahan Saǵynbaev.
