Qazaqstanda pedofıldermen kúres naýqany bastalyp ketti. Qoǵam belsendileri bas bolyp kótegen pedofılderge shara qoldanýda  jazanyń eń aýyr túri  týraly usynysqa endi halyq qalaýlylary da ún qosty.

Bul týraly «Qamshy» portaly KTK arnasyna silteme jasaı otyryp jazady.

Endigi ári Qazaqstandaǵy pedofılderdi «pishtirý» (kastrasıa) arqyly jazalaýdy  engizý týraly usynysty  QR Parlamenti Senatynyń depýtattary qoldady.  Belsendilerdiń QR Qylmystyq kodeksine pedofılderge qatysty jazany aýyrlatý týraly usynysyn osyǵan deıin QR Bas prokýratýrasy da qoldaıtyndyqtaryn jetkizgen.

Psıhologıalyq aýytqýshylyqqa ushyraǵandar nemese qasaqana búldirshinderdiń ómirlerin oıran etýshilerdi «pishtirý» arqyly tyıýǵa bolatyn bolsa, nege qoldamasqa?! Áıtpegende osyǵan deıin qoldanylyp kelgen uzaq merzimdi bas bostandyǵynan aıyrý jazasynan boı tartyp, úreılenip otyrǵan «pedofıl» joq bolyp turǵany jasyryn emes.

Osyny eskergen Senat depýtattary búgin, pedofılderge qoldanylatyn jaza qatań ári jan túrshigerlik bolýy úshin, jedel túrde QR Qylmystyq kodekske ózgertýler engizilip, jábirlenýshi taraptyń keshirimi arqyly jazadan sytylyp ketetinderdiń jolyna bóget qoıý kerek  dep otyr.

Keıbir derekkózderine súıensek, sońǵy 5 aıdyń qorytyndysy boıynsha polısıa men prokýratýra  kámelet jasqa tolmaǵan jáne kishkene búldirshinderge seksýaldyq kúsh kórsetkenderge qatysty 100-den astam isti toqtatqan. Keıbir jaǵdaılarda qylmysker jaqtyń týysqandary jábirlenýshi taraptyń týystarymen ózara kelisimge kelip, keshirim suraý arqyly jazadan bosatylyp júrgen. Al kelesi bir jaǵdaılarda jáı ǵana zańdy belsheden basýshylyqtar bolǵan.

Endi mine, depýtat myrzalar da mundaı bassyzdyqtardy birjolata boldyrmaý úshin, pedofılderge qatysty jazany aýyrlatý, hımıalyq jolmen «pishtirý» týraly usynysty qoldaǵan. Tipti, senator myrzalar, Premer-mınıstrdiń atyna arnaıy hat joldaǵan.

Nurzat Toǵjan