Poezıa padıshasyn eske alýǵa arnalǵan jyr dodasyn oblystyq mádenıet, arhıvter jáne qujattama basqarmasy men «Rýhanıat» jastar uıymy qoǵamdyq birlestigi uıymdastyrdy. Jıynǵa óleńsúıer kórermennen ózge, óńir zıalylary, aqynnyń uly Almas Ońǵarsynov bastaǵan áýleti qatysty. Shara shymyldyǵy M.Ótemisuly atyndaǵy akademıalyq qazaq drama teatrynyń ártisteriniń «Óleń, men seni aıalap ótem» poetıkalyq kompozısıasymen ashyldy. Odan ári oblys ákimi Nurlan Noǵaev quttyqtaý sóz sóıledi.

– Farıza aqyn óziniń ór minezdiligimen, ótkirligimen, batyldyǵymen erekshelenedi. Onyń bul mineziniń ár jaǵynda elge degen qamqorlyq, qoldaý jatatyn. Ol týabitken osynaý qasıetimen ádebıetti alǵa súıredi. Jyr jaýhary atandy. Poezıada shyǵarmashyl býyndardy qalyptastyrdy. Endigi ýaqytta biz poezıa padıshasynyń shyǵarmashylyǵyn nasıhattaı túsýimiz qajet. Onyń artynan ilesken uly kósh jalǵasa berýi tıis. Bul rette osyndaı músháıralardy, eske alý keshterin ótkizýdiń mańyzy zor, – dedi Nurlan Asqaruly.

Uıymdastyrýshylardyń aıtýynsha, Farıza aqynǵa arnalǵan jyr músháırasy jarıalanǵannan beri oǵan qatysýǵa 100-ge tarta aqyn nıet bildirgen. Belgilengen shart boıynsha, aqyndar Farıza aqynnyń óleńdegi, ómirdegi qaıtalanbas bolmysyn jyrǵa qosýy kerek. Baıqaýǵa kelip túsken júzge tarta óleńderdiń ishinen segiz aqynnyń jyry suryptalyp alyndy. Olar sharaǵa meıman retinde qatysyp, 
aqynǵa arnap jazǵan óleńderin de oqydy.

Baıqaý jabyq túrde ótkendikten, aqyndar jyr báıgesine laqap atpen qatysty. Jyr baıqaýyna qazaqtyń kórnekti aqyny, respýblıkalyq Mahambet syılyǵynyń laýreaty, «Qurmet» ordeniniń ıegeri Svetqalı Nurjan tóraǵalyq etti.

Jıyn barysynda qazylar alqasynyń saraptama nátıjesi aıtylyp, Atyraý tórine jınalǵan jeńimpaz aqyndar saltanatty jaǵdaıda marapattaldy.

«Daryn» degen atpen qatysqan almatylyq aqyn Dınara Málik, «Qońdyger» degen aty bar almatylyq Toqtaráli Tańjaryq jáne «Tamshy» atty batysqazaqstandyq Janerke Ǵınaıat úshinshi orynmen marapattaldy. Al, «Baıron» degen atpen qatysqan almatylyq Batyrhan Sársenhan men «Arslan» degen laqap esimi bar atyraýlyq aqyn Asylanbek Shyǵyrov ekinshi orynǵa ıe boldy. Birinshi oryndy «Shalqar» laqap atymen «Daryn» memlekettik jastar syılyǵynyń laýreaty Qalqaman Sarın jeńip aldy.

Al, Bas júlde «Tóre» laqap atymen qatysýshy qaraǵandylyq Mıras Asanǵa buıyrdy. Sondaı-aq, respýblıkalyq jyr músháırasynyń F.Ońǵarsynova atyndaǵy arnaıy júldesi de tabys etildi. Bul marapatty Farıza aqynnyń súıikti nemeresi Alan Ońǵarsynov tarazdyq aqyn Araıly Jaqsylyqqa usyndy.