Jambyl oblysy ákimdiginiń májilis zalynda memlekettik-jekmenshik áriptestik aıasynda óńirde júzege asyp jatqan jumystar jaıy qaraldy. Jıynda oblys ákimdiginiń ekonomıka jáne búdjettik josparlaý basqarmasynyń basshysy Gúldana Jaýynbekova baıandama jasap, eńserilgen mejeler men alda turǵan maqsattardy aıqyndady dep jazady Qamshy.kz aqparat agenttigi. 

Jyl basynda aımaq basshysynyń tapsyrmasyna sáıkes memlekettik-jekemenshik áriptestik aıasyndaǵy jobalardyń biryńǵaı bazasyn qurý tapsyrylǵan edi. Osy oraıda jasalǵan arnaıy tizimde 238 joba bar. Búginde onyń 63 jobasy boıynsha jumystar júrgizilýde. Al qalǵan 42 joba jyl sońyna deıin tolyǵymen aıaqtalmaq.

Óńirde qolǵa alynǵan memlekettik-jekemenshik áriptestik jobalardyń negizgi bóligin áleýmettik saladaǵy nysandar quraıdy. Tek bilim salasynyń ózinde 39 joba júzege asyrylatyn bolady. Osy oraıda basqarma basshysy mektep asqanalarynda qyzmet kórsetýdi memlekettik-jekemenshik aıasynda iske asyrýdyń tıimdiligine nazar aýdardy. Atalǵan joba arqyly asqana qyzmetin uıymdastyrýǵa jyl saıyn konkýrs oınatylmaıdy. Esesine konkýrstyń bir jeńimpazymen 3 jyldan 30 jylǵa deıingi aralyqta turaqty kelisim shart ornatylmaq. Jeńimpaz oqýshylardy tek ystyq tamaqpen qamtyp qana qoımaı, asqananyń jabdyǵyn jańalap, ǵımaratyn jóndep otyrýdy da óz mindetine alatyn bolady.

Aıta keteıik, bul oraıda aldymen oblystaǵy barlyq mektep asqanalaryna taldaý jasalynyp, jabdyǵy tozǵan, jóndeýdi qajet etetin asqanalar tańdap alynǵan. Nátıjesinde jańǵyrtýdy qajet etetin 198 asqana anyqtalǵan. Osyny eskergen Asqar Isabekuly memlekettik-jekemenshik áriptestik aıasynda aǵymdaǵy jyly jobasy júrgiziletin asqanalardyń sanyn eseleý kerektigine kóńil bólip, bul baǵyttaǵy barlyq tetikterdi iske qosýdy atap aıtty. Óńir basshysy konkýrs kelisimshartynda eki taraptyń mindettemelerin tıisinshe naqtylaýdyń mańyzdylyǵyn atap ótti. Oǵan qoǵamdyq komısıalardy tartý jaıy da aıtyldy. Sondaı-aq ystyq tamaqtyń úzdiksiz berilýin, tamaq sapasyna tekseris únemi uıymdastyrylyp otyrylýyn qadaǵalaýdy tapsyrdy.

Basqosýda memlekettik-jekeshelik áriptestik aıasyndaǵy sport, densaýlyq saqtaý, turǵyn-úı sharýashylyq, týrızm salasyndaǵy jobalar da qaralyp, júzege asý barysy saralandy. Jıyn qorytyndysymen jaýapty tulǵalarǵa naqty tapsyrmalar júkteldi.