Jambyl oblysy Merki aýdanyndaǵy «Úmit» oqýshylar saraıynda «Rýhanı jańǵyrý» baǵdarlamasyn iske asyrý aıasynda aýdan mektepteriniń oqýshylary arasynda kórkem jáne sándik-qoldanbaly balalar shyǵarmashylyǵynyń «Altyn qazyna» kórme-baıqaýy ótti.

Oqýshylardyń shyǵarmashylyq qabiletterin damytý, tárbıe berý jáne tulǵalyq damytý, rýhanı-adamgershilik jáne mádenı qundylyqtardy dáripteý, oqýshylar shyǵarmashylyǵynyń kórkem jáne qoldanbaly sándik ónerine degen qyzyǵýshylyǵyn arttyrý maqsatynda ótken baıqaýǵa jalpyǵa bilim beretin 14 mekteptiń oqýshylary qatysty.

Baıqaýǵa qatysýshylar 11 men 14 jáne 15 pen 17 aralyǵyndaǵy jas erekshelikterine qaraı bólindi. Kórme-baıqaýǵa 5 nomınasıa boıynsha, 1 atalymnan bir jumystan qabyldandy. Atap aıtqanda, toqyma buıymdary: gobelen, kesteleý, batık, kıiz basý, quraq plasıkasy; aǵash, súıek, terini kórkemdep óńdeý: kólemdi jáne tegis kesý, qaıyń qabyǵynan jasalǵan buıymdar; shynyny kórkemdep óńdeý: vıtraj jasaý; metaldy kórkemdep óńdeý: zergerlik buıymdar, shaǵyn formalardyń músini, beder salý, soǵý, sazdan, tastan, saban, shıden shaǵyn formalardaǵy músinder jasaý baǵyttary boıynsha jumystar tirkeldi.

Baıqaýda jumystyń kórme nomınasıasyna sáıkestigi, jumystyń oryndalý sapasy jáne kórkemdik deńgeıi, ulttyq dástúrlerdi saqtaý jáne qoldanýy sekildi ólshemdermen baǵalandy. Qazylar alqasynyń qatań qadaǵalaýynan ótken jumystar óz deńgeıine qaraı baǵasyn aldy. Nátıjesinde, «Bas júlde» jáne oblystyq baıqaýǵa joldama «Úmit» saraıynyń oqýshylary – «Qaǵazdy kórkemdep óńdeý» nomınasıasy boıynsha Eldana Qazybekova, «Batık» nomınasıasy boıynsha Fatıma Ryzaeva, «Shynyny kórkemdep óńdeý» nomınasıasy boıynsha Gúlnur Myrzahan, «Keste» nomınasıasy boıynsha Fatıma Latıfova ıelendi.

Al, I orynǵa «Keste» nomınasıasy boıynsha «Órken» shyǵarmashylyq ortalyǵynyń oqýshysy Aıajan Tórebaı, №20 mektepten «Kıiz» nomınasıasy boıynsha Vıktorıa Shıhavsova, «Aǵash» nomınasıasy boıynsha №14 mektepten Beıbarys Tilekuly, «Teri» nomınasıasy boıynsha №13 mektepten Meıirlan Meıirhan, «Tasqa sýret salý» nomınasıasy boıynsha №35 mektepten Aıman Bazarbaılar laıyq dep tanyldy.

Sondaı-aq, baıqaý qorytyndysy boıynsha ózge de júldeli oryndarǵa ıe bolǵan óneri jastardyń jumystary anyqtalyp, marapattaldy.