Almaty qalasynda «Nur Otan» partıasynyń qoldaýymen «Otan otbasynan bastalady» atty aqyndar aıtysy ótti. Bul aıtystyń basty ereksheligi bir otbasynan shyqqan aqyndardyń ózara baq synasýy boldy. Soǵan oraı ónersúıer qaýym áje men nemere, áke men bala, aǵa men ini sıaqty otbasylyq aıtystarǵa kýá boldy.

Aıtystyń ashylý saltanatynda «Nur Otan» partıasy Tóraǵasynyń Birinshi orynbasary Baýyrjan Baıbek bul ónerdiń qazaq úshin qashanda orny bólek ekenin aıtyp, aldaǵy ýaqytta partıa tarapynan aıtysqa júıeli qoldaý kórsetiletinine toqtaldy.

– Aıtys – ejelden kele jatqan asyl muramyz. Bul ónerdiń álem úshin de orny bólek. Sondyqtan IýNESKO aıtysty adamzattyń mádenı muralarynyń tizimine qosyp otyr. Aldaǵy ýaqytta «Nur Otan» partıasy sóz saıysyna júıeli túrde qoldaý kórsetedi. Bul – táýelsizdiktiń alǵashqy kúninen bastap aıtysty qoldap kele jatqan Elbasy, partıa Tóraǵasynyń tikeleı tapsyrmasy, – dedi Baýyrjan Baıbek.

Sondaı-aq ol tól ónerimizdiń halyqty alańdatqan máselelerdiń oń sheshilýine yqpal etetin qozǵaýshy kúsh ekenin de atap ótti.

– Aıtysta qoǵamdaǵy ózekti máseleler ashyq aıtylyp, ortaǵa túrli oń usynystardyń tastalatyny belgili. Máselen taıaýda ǵana Qaraǵandyda ótken halyqaralyq aqyndar aıtysynda kóptegen utymdy oılar aıtyldy. Olardyń bárin jergilikti basshylyq eskerip, sol boıynsha naqty jumystardy qolǵa alady dep senemiz. Máslıhattardaǵy bizdiń fraksıanyń músheleri de osyndaı aıtystarǵa arnaıy kelip, aqyndar kótergen máselelerdi jazyp alyp, olardyń ári qaraı oryndalýyn qadaǵalaýǵa alady, – dedi Baýyrjan Baıbek.

Sóz barysynda aıtystyń taqyrybyna da nazar aýdarǵan ol otbasy men salt-dástúr partıanyń basty qundylyqtarynyń biri ekenin jetkizdi.

– Bul aıtystyń taqyrybyn «Otan otbasynan bastalady» dep alýymyzdyń sebebi eń basty qundylyǵymyz otbasy ınstıtýtyn odan ári nyǵaıtyp, sol arqyly eldigimizdi kúsheıtý. Óıtkeni partıamyzdyń Doktrınasynda adam, onyń bostandyǵy, zańnyń ústemdigi, ádilettilik sıaqty qundylyqtarmen birge otbasy jáne dástúrge de erekshe mán berilgen. Sondyqtan tól ónerimizge júıeli qoldaý kórsetip, iri alaman aıtystardy turaqty ótkizip turamyz. Sonyń arqasynda aıtys óneri jańa deńgeıge kóteriledi dep senemiz, – dedi «Nur Otan» partıasy Tóraǵasynyń Birinshi orynbasary.

Otbasylyq sóz saıysynda elimizdiń birqatar óńirinen kelgen 7 aqyndar juby óner kórsetti. Atap aıtqanda, aıtysker ana Egeýhan Muqamádıqyzy (Dáýletkereı Kápulynyń anasy) nemeresi, jas talant Ardakereı Káppen, aqyn Qaıyrtaı Aqylbekov uly Rústem Qaıyrtaıulymen, Bekarys Shoıbekov inisi (aǵasynyń uly) Dáýren Aqsaqalovpen, Iran-Ǵaıyp Kúzembaev aǵasy Talǵat Kúzembaevpen, Amangeldi Panaberdıev aǵasy Serikbol Panaberdıevpen, Bekjan Erjigit aǵasy Erjan Ámirovpen jáne Dıdar Qamıev inileri Ulanǵasyr, Aıdar Qamıevtermen aıtysty.

Aqyndar otbasylyq qundylyqtar tutas elimizdiń damýyna tikeleı áser etetin basty tetikterdiń biri ekenin aıtyp, erteńimizdiń jarqyn bolýy úshin osy máselege erekshe kóńil bólý kerektigine toqtaldy. Ásirese, bala tárbıesine, jastardy adal eńbekke, otanshyldyqqa baýlýǵa, qoǵamdy masyldyqtan aryltýǵa qatysty utymdy sózder aıtyldy. Máselen Qamıevter aıtysynda jastarǵa jyr-dastandardy jattatqyzýdyń mańyzy zor ekeni sóz bolsa, áje men nemere aıtysy atalǵan Káp áýletiniń sóz saıysynda táýelsizdiktiń qadir-qasıeti keńinen dáripteldi. Al ákeli-balaly Qaıyrtaı Aqylbekov men Rústem Qaıyrtaıuly aýyl men qala halqyn alańdatqan máselelerdi túgel qamtyp, jyrǵa qosty. Odan bólek, aqyndar ádemi ázil men qaǵytpa qaljynǵa da oryn taýyp, zalǵa jınalǵan aǵaıynnyń ystyq yqylasyna bólendi.

Nátıjesinde áıgili teatr jáne kıno akteri, Qazaqstannyń Eńbek Eri Asanáli Áshimov bastaǵan qazylar alqasynyń sheshimimen Qaıyrtaı Aqylbekov men Rústem Qaıyrtaıulynyń juby bas júlde 3 mıllıon teńgeni enshiledi. Ekinshi oryn (2 mıllıon teńge) áje men nemere bolyp sahnaǵa shyqqan Káp áýletine buıyrsa, úzdik úshtikti (1 mıllıon teńge) aǵaıyndy Qamıevter túıindedi. Aıtysqa qatysqan basqa da aqyndarǵa qarjylaı syı-sıapat kórsetildi.

Osy rette eskere keter jaıt, kúnniń dúısenbi bolǵanyna qaramastan aıtystyń aq saraıy atanyp ketken «Respýblıka saraıynda» ıne shanshar oryn bolǵan joq. Bul halyqtyń aıtysqa degen erekshe mahabbaty men yqylasynyń jarqyn kórinisi ekeni sózsiz.

Aıta keteıik, buǵan deıin elimizde «Nur Otan» partıasynyń qoldaýymen jyldyń sońyna deıin bes birdeı alaman aıtys ótetini jarıalanǵan bolatyn. Almatydaǵy aıtys sonyń úshinshisi. Osyǵan deıin Atyraý jáne Qaraǵandy qalalarynda uıymdastyryldy. Endi Nur-Sultan jáne Oral qalalarynda ótpek.