Elbasy N.Nazarbaevtyń Jarlyǵymen jarıalanǵan Jastar jyly aıasynda Jambyl oblysynda jemisti jumystar jalǵasýda. Ásirese, jastardyń shyǵarmashylyǵyn damytyp, jańa esimderdi jurtshylyqqa tanytýǵa basymdyq berilýde. Bul turǵyda túrli sharalar ótkizilip, jarqyn jobalar júzege asýda. Jýyrda oblys ákimdigi jastar saıasaty máseleleri basqarmasynyń qoldaýymen «Jaıdarly» Jastar KVN lıgasy» jastar qoǵamdyq birlestiginiń uıymdastyrýymen Taraz qalasyndaǵy «Balasaǵun» ortalyq konsert zalynda Jambyl ashyq lıgasynyń ½ jartylaı fınal oıyny ótkizildi. Sharaǵa «Prestıj» (Taraz «Parasat» koleji), «KTL quramasy» (Daryndy er balalarǵa arnalǵan «Bilim-Innovasıa» lıseıi), «Medıým», «8-shi Páter» (M.H.Dýlatı atyndaǵy Taraz memlekettik ýnıversıteti), «Jokers», «Raıan-Nur» (TarMPÝ) jáne Nur-Sultan qalasynan «Saryarqa», Qyzylorda oblysynan «BÝ quramasy», Jýaly aýdanynan "Bolashaq quramasy" qatysty. Oıyn qorytyndysy boıynsha birinshi oryndy «Medıým» (TarMÝ) komandasy jeńip aldy. Al ekinshi oryndy «Raıan-Nur» (TarMPÝ) enshilese, úzdik úshtikti Qyzylorda oblysynyń «BÝ quramasy» túıindedi.

Al, aǵymdaǵy jyldyń qarasha aıynda ótetin oblystyq «Stýdenttik bal-2019» merekelik keshine «Prestıj» (Taraz «Parasat» koleji) men «Raıan-Nur» komandasy (TarMPÝ) joldama aldy. Óz kezeginde «Raıan-Nur» komandasy joldamasyn ónerdegi inileri «Jokers» komandasyna usyndy.

Sonymen qatar jaqynda oblys ákimdiginiń jastar saıasaty máseleleri basqarmasy jáne Taraz ınovasıalyq-gýmanıtarlyq ýnıversıtetiniń qoldaýymen Jambyl oblystyq pikirsaıys odaǵy "Erkin pikir" jastar qoǵamdyq birlestigi "Stýdent FEST" oblystyq keshendi festıvali aıasynda "Úzdik pikirsaıys alańy" atty oblystyq pikirsaıys týrnırin ótkizdi. Atalmysh týrnırge joǵary jáne arnaýly orta oqý oryndarynan 32 fraksıa qatysty. Oıyn qorytyndysy boıynsha birinshi oryndy "Jastar jalyny", ekinshi oryndy "Shyǵystyń qyzdary", úshinshi oryndy "Iýrısty-aferısty", "Úzdik spıker" nomınasıasyn Bektas Saýranbaev, "Úzdik tóreshi" nomınasıasyn Nurdáýlet Serikuly ıelenip, oblystyq "Stýdenttik bal-2019" merekelik keshine joldama aldy. Jeńimpazdardyń marapattary kesh aıasynda saltanatty túrde tabystalatyn bolady.