Sońǵy kezderi Jambyl oblysyna ınvestorlardyń erekshe qyzyǵýshylyǵy oıana bastady. Óńirdiń transporttyq jáne geografıalyq áleýeti syndy ınvestısıalyq klımatqa áser etetin faktorlarmen birge onyń klımattyq jaǵdaıy da sheteldik ınvestorlardyń óńirge kóptep kelýine túrtki bolyp otyr. Óıtkeni óńirde túrkıalyq ınvestorlardyń qarjylandyrýymen qýattylyǵy 400 megavat bolatyn taǵy bir kún elektr stansıasy salynbaqshy, dep jazady Qamshy.kz aqparat agenttigi. 

Bul biregeı ınvestısıalyq jobany júzege asyrýǵa nıet etip otyrǵan «Global Stroı» jaýapkershiligi shekteýli seriktestiginiń quryltaıshysy Býlgan Ahmet Dúran men bas dırektory Ýıgýn Eıýptyń aıtýynsha ınvestorlardyń tańdaýy Jambyl oblysyna tekten-tek túspegen. Óıtkeni elimizdiń ońtústiginde ornalasqan bul aımaqqa kún sáýlesi óte kóp túsedi. Sondaı-aq kásipkerler óńirdegi kún men jeldiń ońtaıly qozǵalysy da stansıa jumysynda basty faktor sanalatynyn jasyrmady. Óz kezeginde, kún elektr stansıasy kún sáýlesinen energıa alýda jańa tehnologıalardyń múmkindigin molynan paıdalanýǵa ıek artyp otyr. Bolashaqta «Global Stroı» jaýapkershiligi shekteýli seriktestiginiń ınvestısıasy esebinen elimizde 8 myń megavattyq stansıa salynbaq.

Óz kezeginde jergilikti bılik túrkıalyq ınvestorlardy barynsha qoldaýǵa ázir. Olardyń óz jobalaryn iske asyrýyna qajettti barlyq tetikter qarastyrylady. Jalpy Jambyl óńirinde balamaly energıa óndirý baǵytynda mol tájirıbesi bar. Máselen Jýaly aýdanyndaǵy «Býrnoe solar» kún elektr stansıasy 100 megavattyq qýattylyqpen jumys jasaýda. Jýaly aýdanynyń Nurlykent aýyly mańyndaǵy stansıaǵa qajetti elektr energıasyn óndirýge qajetti kún panelderi 74 gektar aýmaqqa ornalastyrylǵan. Ótken jyldyń sońynda ekinshi kezeńi iske qosylǵan stansıa 40 myń úıdi elektr jaryǵymen qamtamasyz etýge qaýqarly. Sonymen qatar Sarysý aýdanynda da jańa elektr stansıasynyń qurylysy qarqyndy júrgizilýde. Sáıkesinshe bul jobalardyń ınvestısıa tartyp, jergilikti jerdiń ekonomıkalyq áleýetin kóterýden bólek óńirdegi ózge memlekettiń elektr energıasyna táýeldilik máselesiniń de sheshimin qarastyrýymen erekshelenedi.