RF-da Qazaqstan men Reseı arasyndaǵy dıplomatıalyq qatynastardyń negizin qalaýshy Oraz-Muhammed Ondanulynyń tulǵasy men qyzmeti týraly halyqaralyq konferensıa ótti. Bul týraly Reseıdegi Qazaqstan Elshiliginiń baspasóz qyzmetine silteme jasap, Qamshy.kz aqparat agenttigi habarlaıdy.

"Qazirgi tarıhtaǵy Oraz-Muhammed Ondanulynyń róli" atty ǵylymı konferensıaǵa Qazaqstan men Reseıdiń tarıhshy ǵalymdary, ýnıversıtet profesorlary qatysty.

Konferensıany Qazaqstan Respýblıkasynyń Reseı Federasıasyndaǵy Tótenshe jáne Ókiletti Elshisi Imanǵalı Tasmaǵambetov ashty.

Baıandama barysynda elshi  qazaq halqymen Oraz-Muhammed sultandy araǵa úsh jarym ǵasyr salyp qaıta qaýyshtyrǵan jazýshy Muhtar Maǵaýınnyń "Alasapyran" romany ekenin eske saldy.

 Imanǵalı Tasmaǵambetovtyń aıtýynsha, barsha Alash jurty úshin baıraqty babamyzdyń jat elde jarty patshalyq qurýy ańyzǵa bergisiz aqıqat.

"Al onyń el men eldi tabystyrǵan qyzmeti – mártebeli abyroı. Óıtkeni Oraz-Muhammed orys jerine jeke dara kelgen joq. Ol búkil el amanatyn, uly dalanyń dos peıili men beıbit yqylasyn ala keldi. Sodan bolar tabıǵı tákapparlyǵy men batyldyǵynyń, zerektigi men ádildiginiń arqasynda úlken bedelge ıe boldy. Osy eldiń taǵdyrsheshti syn saǵatyna aralasty. Atqa qonyp, eńseli erteńi úshin kúresti. Adamdar tarıhı prosesterdiń logıkasyn uǵynýǵa tyrysyp qana qoımaıdy, sonymen qatar prosestiń ınersıasyna áser etip, oqıǵalardyń barysyna betburys jasaǵan qaharman tulǵalar týraly aqıqatty da bilgisi keledi. Uly Dalada ǵana emes, jat jurtta, orys jerinde dańqty isterimen tanymal bolǵan Sultan Oraz-Muhammedti osyndaı tulǵalardyń shoǵyryna jatqyzýǵa bolady", - dep elshi sózin túıindedi.