QR prezıdentiniń baspasóz hatshysy Berik Ýálı óziniń facebook-taǵy paraqshasynda qoǵam jáne memleket qaıratkeri, kórnekti jazýshy Ábish Kekilbaevtyń týǵanyna 80 jyl tolýyna oraı uıymdastyrylǵan jıynǵa arnalyp jazylǵan baıandamasynyń mátinin jarıalady. Onda Berik Ýálıuly qazaq ádebıeti abyzynyń ult úshin, memleket úshin sińirgen eńbegi, tól ádebıetimizge salǵan súrleýi týraly oı tolǵaǵan.

«Ábish álemi» oqý kongresinde sóz sóıleısiz degen soń shaǵyn baıandama daıyndaǵan edim. Sol kúni jumys qaýryt bolyp bara almadym. Odan keıin issaparlarǵa shyǵyp kettik. Qysqasy, Abyz Ábish aǵam týraly jazǵanymdy áleýmettik jelide jarıalandy jón kórdim.

«Ulylyqtyń etalony qandaı bolady?» dese, kóz aldymyzǵa birden Ábish Kekilbaıuly keledi. Álemniń ilimi men bilimin bir boıyna jıǵan, parasat-paıymy keń, qaıratkerlik pen qalamgerlik qasıet qatar qonǵan asyl abyzdyń ultyna degen mahabbat-meıirimi júzinen tógilip turýshy edi. Sóılep ketse, elimizdiń qadym zamandaǵy tarıhyn tiriltip, búgingi jaıy men kúıin naqty aıtyp, bolashaǵyna zor úmitpen qaraıtyn.

Ábish Kekilbaıulynyń árbir shyǵarmasy oqyrmandy ótkenniń munaryna, bolashaqtyń shyńyna shyǵarady. Adamzattyń eń izgi qundylyqtaryn oıymyzǵa sińirdi. "Ańyzdyń aqyry", "Eleń-alań", "Úrker", "Shyńyraý" sekildi shoqtyǵy bıik shyǵarmalary álemniń klasıkalyq týyndylarynyń qataryn tolyqtyrdy desek, aqıqattan alys ketpeımiz.

Táýelsizdiktiń eleń-alańynda memleketimizdiń aıaqtan turýyna, Egemendigimizdiń eńseli bolýyna, Azattyǵymyzdyń aıshyqtala túsýine zor úles qosty. Boıyndaǵy qajyr-qaıratyn, ómirlik tájirıbesin elimizdi órkendetýge arnady. Eńbegi eleýsiz qalmady. Elbasy "Qazaqstannyń Eńbek Eri" ataǵyn óz qolymen tapsyrdy. Muny tutas qazaq halqynyń Ábish aǵaǵa kórsetken qurmeti dep túsinemiz.

Memleket basshysy Qasym-Jomart Toqaev el tizginin qolyna alǵannan keıin óńirlerge ekinshi jumys saparyn qasıetti Mańǵystaý jerine arnaǵanyn bilesizder. Bul kezdeısoq jaǵdaı emes. Óıtkeni Mańǵystaý – barshaǵa belgili 362 áýlıeniń mekeni jáne Pir Beket, Shaqpaq ata, Shopan ata sıaqty ǵulama babalarymyz ómir súrgen jer. Qazaqstan Prezıdenti osy saparynda «Qazaqtyń tańdaıy» atanǵan Ábish Kekilbaıdaı tulǵaǵa aıryqsha qurmet kórsetýge tıispiz dep aıtqan bolatyn. Memleket basshysy Mańǵystaý jerinde ótken Ábish aǵamyzdyń 80 jyldyq mereıtoıyna arnaıy kelemin degen ýádesinde turǵanyn aıtqan abzal. Osynaý aıtýly mereıtoı barysynda Qazaqstan Prezıdenti zańǵar tulǵanyń qurmetine turǵyzylǵan eskertkishti óz qolymen ashyp, jańa ǵımaratqa kóshken óńirdegi tarıhı-ólketaný mýzeıine Ábish Kekilbaıulynyń esimin berdi.

Memleket basshysy Ábish aǵanyń 80 jyldyq mereıtoıynda sóılegen sózinde kórnekti qaıratkerdiń egemen elimizdiń tarıhı shejiresinde óz qoltańbasyn qaldyrǵanyn atap ótip, onyń «Táýelsizdik – tátti sóz ǵana emes, ulttyq jaýapkershilik» degen tujyrymy barshaǵa oı salatynyn aıtty. Sonymen qatar Qasym-Jomart Toqaev qazirgi jastarymyz Ábish Kekilbaevtyń qoǵamdyq-saıası kózqarastaryn tanyp-bilýi kerek ekenin, birtýar tulǵanyń «Táýelsizdik bizdiń tilegimizdi emes, biz onyń tilegin tileýimiz qajet» degen sózi búgingi býynnyń ustanymyna tolyq saı keletinin zerdelep berdi. Sondyqtan Memleket basshysy Ábish aǵany el múddesin joǵary qoıǵan naǵyz patrıot dep sanaıtynyn jetkizdi.

Qazaqstan Prezıdenti óz sózinde Ábish Kekilbaıdyń Joǵarǵy Keńes tóraǵasy, Memlekettik hatshy, Senator qyzmetterin abyroımen atqarǵanyn atap ótip, «Ábish aǵamen Parlamentte áriptes retinde etene aralasyp, erekshe syılastym. Biz búgin rýhyn ulyqtap otyrǵan Ábish Kekilbaı – adamzattyq bolmystyń joǵary deńgeıine kóterilgen birtýar tulǵa, qazaq halqynyń uly perzenti. Halyqtyń maqtanyshyna aınalǵan azamattardyń esimin jadymyzdan shyǵarmaý – barshamyzdyń paryzymyz» dep atap ótken bolatyn.

Ábish Kekilbaıuly sanaly ǵumyryn eline qaltqysyz qyzmet etýge arnaǵan ardaqty azamat retinde barsha halyqqa ultjandylyqtyń ozyq úlgisin kórsetti. Osy oraıda Memleket basshysy patrıotızm, eń aldymen, tól tarıhymyz ben shyqqan tegimizdi tereń uǵynýdan bastalatynyn jáne el eńsesin kótergen jetistikterimizdi jas urpaqtyń bilgenin mańyzdy sanaıdy.

«Jaqsynyń aty, ǵalymnyń haty ólmeıdi» deıdi halyq danalyǵy. Ábish Kekilbaıulynyń súbeli eńbekteri – halqymyzdyń rýhanı qazynasyna qosylǵan asyl mura. Onyń shyǵarmalary keıingi urpaqtyń ómirlik temirqazyǵyna aınalary haq. Sondyqtan Ábish aǵanyń rýhy qazaq halqymen máńgi birge jasaı beredi.

Búgingi «Ábish álemi» oqý kongresiniń jumysyna sáttilik tileımin.
«Úrker» aýmasyn, «Ańyzdyń aqyry» aıaqtalmasyn!

1-sýret

R.S. 1-sýretti 2015 jyldyń qyrkúıeginde Qazaq handyǵynyń 550 jyldyǵan el bolyp atap ótkende elordada túsken edik.

 2-sýret

2-sýretti 2009 jyldyń jeltoqsanynda Ábish aǵamyz senator bolyp júrgende "Betpe-bet" baǵdarlamasyna qonaqqa shaqyrǵanda túskenbiz.