8 jeltoqsanda Oralda jeti jyldan keıin alǵash ret ruqsat etilgen mıtıń ótti dep jazady Qamshy.kz aqparat agenttigi Azattyqtyń deregin negizge alyp. Qarsylyq sharasyna kelgender baǵanyń ósýine, jemqorlyqqa, elde adam quqyǵynyń buzylyp jatqanyna narazylyqtaryn bildirdi.

Sharaǵa kelgender "Stop corruption", "Áleýmettik ádildikti talap etemiz!", "Polısıa óz fýnksıasyn oryndasyn!", "Shyndyq úshin emes, zorlyq úshin qamańdar!", "Astyqty elde nan nege qymbat?" degen jazýy bar plakattar ustap shyqty. 

Mıtıńini jýrnalısermen birge ákimdik ókilderi, polıseıler baqylap turdy. Qarapaıym kıingen birneshe adam sharany kameraǵa túsirip júrdi.

Jınalǵandardyń arasynda áleýmettik kómek pen nesıe keshirýdi talap etkender, Shaǵan ózeni arqyly kópir salýǵa qarsy shyqqandar da boldy.

Sharany uıymdastyrýsha Maqsat Aısaýytov bul Oraldaǵy jeti jyldaǵy alǵash ret ruqsat etilgen mıtıń ekenin aıtty.

- 28 qarashada mıtıń ótkizý týraly ótinish berdik. Bes kúnnen keıin ruqsat aldyq. Tań qaldyq. Sebebi sońǵy jylda biz aksıa ótkizýge júzdegen ótinish bergen edik. Ár kezde bılik biz suraǵan kúni basqa shara josparlanǵanyn, mıtıń ótkizetin jerdiń bos emesin aıtatyn, - dedi ol.

Mıtıńige kelgenderdiń birazy saıası máselelerdi de kóterdi. Múgedek Bekbolat Ótebaev mıkrofon alyp, Qazaqstan prezıdenti Qasym-Jomart Toqaevqa qaıyryldy.

Birneshe ret kredıt aldym jáne ýaqtyly tólep otyrdym. Sońǵy ret ózimniń emime dep bir ret, qyzymnyń emine dep taǵy kredıt aldym. Biraq emdele almadym. Maǵan jumysqa jaramsyz degen anyqtama berdi. Qazir jumys istemeımin, 30 myń teńge kómek alamyn. Kishi qyzym da 30 myń teńge alady. Áıelim 36 myń teńge tabady. Osy tabysqa biz dári alyp, kredıt tólep, tamaqtanýymyz kerek. Bir jyl boıy áleýmettik kómek bermeı keledi. Sheneýnikter “qyzyńyz oqýdan shyǵyp, jumys istesin”, “aýyryp jata bermeı jumys iste” deıdi. AHAJ ben Eńbek jáne áleýmettik qorǵaý departamentine birneshe ret bardym. Biraq olar meniń ne úshin “kredıti keshirilgenderdiń” sanatyna enbegenimdi túsindirip bere almady, - deıdi ol.

Ózin quqyq qorǵaý organdaryna qaıta jumysqa alýdy talap etip júrgen burynǵy polıseı Álbek Erǵazıev sóılep turǵanda onyń sózin jergilikti basylymnyń jýrnalısi bóle berdi. Tilshi Erǵazıevke sóıleýge múmkindik bermeı, oǵan suraq qoıyp, komentarı talap etti.

Mıtıńiniń ortasynda mıkrofon istemeı qaldy. Dybys operatory “ózine bireý qońyraý shalyp, mıkrofondy óshirýdi talap etkenin” aıtty. Keıin mıkrofon qaıta istegenimen, daýysy durys estilmedi.

Sharany uıymdastyrýshy Maqsat Aısaýytovtyń sózinshe, ákimdik qyzmetkeri sahna shetinde turyp saıası taqyryptarda sóz sóılegenderden mıkrofondy tartyp alýdy suraǵan.

Erbol Kýshekov (Oral qalasy ishki saıasat basqaramasynyń jetekshisi – red.) qaıta-qaıta kelip, “áleýmettik máselelerdi ǵana aıtyńdar” deýmen boldy. Ol mıtıńide saıası taqyryptar aıtýǵa bolmaıtynyn osylaı meńzedi, - deıdi Aısaýytov.

Kýshekov jýrnalısine “jumys ýaqytynda pikir bere almaıtynyn, mıtıńiden soń tilshilermen suhbattasatynyn” aıtqan. Biraq mıtıńiden keıin tilshiler ony tappaı qaldy.