Qazaqstandyq prokýrorlar Baqytjan Saǵyntaevtń jobalaryna kúdikpen qaraı bastady. Erkin ekonomıkalyq aımaqqa ınvestorlar ornyna revızorlar kelgen.  Bul týraly «ratel.kz» jýrnalısi Jamılá Marıcheva jazady.

Pavlodarlyq prokýrotýra «Pavlodar» erkin ekonomıkalyq aýmaǵyna tekseris júrgizgen. Al atalmysh ekonomıkalyq zona qazirgi vıse-premer mınıstri Baqytjan Saǵyntaevtyń 2011 jyly oblys ákimi bolyp turǵan kezindegi bastamasymen ashylǵan bolatyn.

Odan beri hımparktyń ınfrastrýktýrasyn órkendetýge memleket qazynanasynan mıllardtaǵan qarjy bólingenimen nátıje joqtyń qasy. Bul týraly qazaqstandyq BAQ az jazbaǵan.

Mysaly, atalmysh hımparktyń aınalasyn qorshaýǵa búdjetten  230 mıllıon teńge jumsalǵan. Alaıda eshqandaı ınvestor hımparkke qyzyǵýshylyq tanytpaǵan.

Sondaı-aq, atalmysh aýmaqta sý qubyrlaryn jóndeý úshin taǵy 700 mıllıon teńge jumsalypty. Dese de, zaýyt áli óz jumysyn tolyq bastamaǵan. Al jańa jóndelgen sý qubyrlary qaıta jóndeýdi talap etip tur deıdi avtor.

Aıtpaqshy, zaýyttyń qorshaýlary men sý qubyrlarynan ózge kedendik baqylaý qurylǵylary ornatylǵan. Al munyń somasy – 450 mıllıon teńgege jýyqtalǵan jáne qazirgi tańda zaýyt aýmaǵynda 3,7 mıllıard teńgege baǵalanǵan taǵy bir qurylys júrgizilip jatyr.

Nurzat Toǵjan