Abaı Qunanbaıulynyń 170 jyldyǵyna arnalǵan merekelik sharalar legi «Abaı jáne álemdik órkenıet» atty Halyqaralyq ǵylymı-praktıkalyq konferensıasynan bastaý alady. Konferensıaǵa sheteldik jetekshi ádebıettanýshylar, fılosof, tarıhshylar, áleýmettanýshylar, til mamandary men Abaı shyǵarmalaryn álem tilderine tárjimalaǵan sheteldik aýdarmashylar qatysady.
Aǵymdaǵy jylǵy mereıtoıda Hákim Abaıdyń kelbeti jańa qyrynan tanyla túspek. Memlekettik tildi damytý qorynyń qarjylandyrýymen, Aqberen Elgezektiń avtorlyǵymen túsirilgen «Abaı» derekti fılminiń tusaýy kesiledi. Derekti fılmde kórermen-qaýym halyq aǵartýshysy Abaıdy jańa qyrynan tanı otyryp, alǵan bilimi, shyǵys tárbıesi jaıly qundy derektermen jáne basqa da osy ýaqytqa deıin beımálim bolyp kelgen tustarymen tanysa alady.
Abaı atyndaǵy teatrda «Adamzattyń Abaıy» atty saltanatty sharasy ótedi. Artynsha dál osy teatrda kórnekti óner maıtalmandarynyń qatysýymen konserttik baǵdarlama jalǵasyn tabady.
Abaıdyń 170 jyldyǵynda qonaq retinde memleket jáne qoǵam qaıratkerleri, aqyndar, túrkitanýshylar, ǵalymdar, profesorlar jáne Abaı shyǵarmasyn aýdarǵan sheteldik jazýshylar keledi.
Merekelik sharalar 7-shi tamyzda Abaı aýdanynda jalǵasady. Aýdanynda ornalasqan etnoaýyl, murajaı-úıi, «Abaı-SHákárim» memorıaldyq kesheni, «Eńlik-Kebek» eskertkishinde bolǵan shara qonaqtary, Mamaı batyr eskertkishiniń ashylý saltanatynda qatysady. Sondaı-aq, bul kúni Qaraýylda Qazaq kúresinen Qazaqstan chempıonaty, «Jorǵa jarys», «Alaman báıge», «Abaı toıynyń bas palýany» syndy saıystar ótetin bolady. Josparlanǵan is-sharalar «Adamzattyń bárin súı, baýyrym dep» atty Respýblıkalyq aqyndar aıtysyna ulasady. Baıraqty básekege elimizdiń ár aýmaǵynan kelgen 12 úzdik aıtysker qatysady. Olardyń arasynda Serikzat Dúıenǵazın, Sara Toqtamysova, Aınur Tursynbaeva, Aıbek Qalıev syndy tanymal aıtyskerler baq synasady.
Abaı qazaqtyń ulttyq jazba ádebıetiniń negizin qalaǵan aǵartýshy. Abaıdyń artynda qazaq halqynyń altyn qazynasy -170 óleń, 56 aýdarma, poema, 40 «Qara sóz» jáne búgingi kúni tanymal 200-ge jýyq ánderi men kúıleri qalǵan.
