Almatyda qoǵam belsendisi Dýlat Aǵadilmen qoshtasý jıyny mıtıńige ulasty.

60 shaqty adam qalalyq prokýratýra ǵımaratyna kelip, qalalyq prokýrordyń shyǵýyn, sońǵy kúnderi ótken mıtıńiler kezinde ustalǵan 18 azamatty bosatýyn talap etti.

Azamattar aldyna Almaty qalasynyń prokýrory Berik Júıriktaevtiń orynbasary shyǵyp, azamattar sot sheshimimen qamalǵanyn aıtyp, kelispegen jaǵdaıda Joǵarǵy sotqa shaǵymdanýǵa bolatynyn málim etti.

Jınalǵan azamattar Almaty prokýrory Berik Júıriktaevtiń shyǵýyn talap etip, "halyqtyń shydamy sheksiz emes, sondyqtan qamalǵan azamattardy bosatyńyzdar. Bir adamdy óltirip bizdi qorqyta almaısyzdar. Biz qoryqpaımyz. "Bostandyq", zań joq" dep urandaýda.

Prokýratýra ókili mıtıńiniń zańsyz ekenin málim etip, jınalǵandardyń taraýyn surady.

Ózin Asynbek Qaraıov dep tanystyrǵan azamat prokýratýra ókiliniń sózi provakasıa ekenin, bul eshqandaı mıtıń emes, prokýratýraǵa aryz-shaǵymdy aıtý ekenin jetkizdi.

Jınalǵandar qala prokýrory shyqpaǵan soń Almaty qala ákimdigi ǵımaratynyń aldyna kelip, ákim Baqytjan Saǵyntaevtyń shyǵýyn talap etýde.

Ákimdik ókili azamattarǵa talap-aryzdaryn ózine aıtýyn, Saǵyntaevtyń ornynda emes ekenin aıtty. Biraq azamattar oǵan kelispedi. Belsendi Asynbek Qaraıov "Biz búlikshi emespiz. Qýǵyn bolmasyn, kisi ólimi bolmasyn" degen talabymyzdy qala ákimine kózbe-kóz aıtqymyz keledi. Sodan keıin taraımyz" dedi.

Alaıda qala ákimi qarasyn kórsetpedi. 60 shaqty adam birneshe saǵat kútip, sońynda qoǵam belsendisi Dýlat Aǵadilge, táýelsizdik úshin qurban bolǵan jeltoqsanshylarǵa arnap quran oqydy.

Artynsha beıbit túrde taraı bastady.