Qazaqstanda koronavırýsqa baılanysty qurylǵan tótenshe jaǵdaı jónindegi memlekettik komısıa 28 naýryzdan bastap Nur-Sultan jáne Almaty qalalarynda karantın rejımin kúsheıtý týraly sheshim shyǵardy. Bul týraly Rrimeminister.kz saıty habarlady.

Memlekettik kommısıa shyǵarǵan sheshimge sáıkes, 28 naýryz saǵat 00.00-den bastap Almaty men Nur-Sultanda tómendegideı shekteýler qoıylady.

• Azyq-túlik, dári-dármek satyp alýdy jáne jumysqa barýdy qospaǵanda, azamattardyń turǵyn úıden shyǵýyn shekteý;
• Halyq kóp jınalatyn oryndardy jabý (saıabaqtar, skverler, jaıaý júretin kósheler, jaǵalaýlar, oıyn alańdary jáne t. b.);
• Qoǵamdyq kólik jumysyn kezeń-kezeńmen shekteý;
• Kóshelerde jáne basqa da qoǵamdyq oryndarda úsh adamnan artyq toptasyp jınalýǵa tyıym salý (otbasy múshelerinen basqa);
• Kámelettik jasqa tolmaǵandardyń úlkendersiz syrtta júrýine tyıym salý. 

Qazaqstanda 26 naýryz kúni vırýs juqtyrǵandar kúrt kóbeıdi. Densaýlyq saqtaý mınıstrliginiń deriginshe, búgin 28 adamnan vırýs tabyldy. Elde indet juqtyrǵandar sany 109-ǵa jetti. Qazir Almatyda – 40 adam, Nur-Sultanda – 61 adam, Qaraǵandyda – eki adam, Shymkentte – eki adam, Almaty oblysynda – bir adam, Aqtóbe oblysynda – bir adam, Jambyl oblysynda – bir adam, Soltústik Qazaqstan oblysynda bir adam emdelip jatyr. 

Koronavırýsqa baılanysty Qazaqstannyń barlyq aýmaǵynda 16 naýryzdan 15 sáýirge deıin tótenshe jaǵdaı. Al Almaty men Nur-Sultan 19 naýryzdan bastap karantınge jabylǵan. Bul qalalarǵa kirip-shyǵýǵa tyıym salynǵan. Búginnen bastap qala ishinde azyq-túlik dúkenderi men dárihanalar ǵana jumys istep tur.