26 naýryz saǵat 21.00-de Qazaqstannyń densaýlyq saqtaý mınıstrligi Qaraǵandyda koronavırýs juqtyrǵan eki adam anyqtalǵanyn habarlady. Buǵan deıin de Qaraǵandyda eki adamnan vırýs tabylǵan. 

Sońǵy derek boıynsha, elde 13 naýryzdan beri 111 adam koronavırýs ınfeksıasyn juqtyrǵan. Olardyń bireýi dertinen aıyqsa, búgin ǵana bir adam koronavırýstan qaıtys boldy. İndet juqtyrǵandardyń basym bóligi Almaty men Nur-Sultanda tirkelgen. 

Koronavırýsqa baılanysty Qazaqstannyń barlyq aýmaǵynda 16 naýryzdan 15 sáýirge deıin tótenshe jaǵdaı jarıalandy. Al Almaty men Nur-Sultan 19 naýryzdan bastap karantınge jabylǵan. Bul qalalarǵa kirip-shyǵýǵa tyıym salynǵan. Búginnen bastap qala ishinde azyq-túlik dúkenderi men dárihanalar ǵana jumys istep tur.