Kaspıı teńiziniń Quryq portynda parom kesheni salynyp, kásipkerler men kásporyndarǵa jaǵalaýǵa shyǵýǵa múmkindik týdy, dep habarlaıdy «QTJ» UK» AQ baspasóz qyzmetinen. 

«Taıaýda arnaıy tehnıkalar sany 200-ge jetedi. Eki aýysymda jumys jasaýǵa bolady. Bıylǵy jylǵy josparymyzda temir joldyń topyraq tósemin jasap, Quryq selosynan portqa deıin optıkalyq talshyqty VL-110 kVt elektr jelilerin tartamyz. Ersaı stansasynan temir joldyń kirme telimderin tóseımiz», - deıdi jobanyń bas ınjeneri Marat Dúısenbaev.

Búgingi tańda temir joldyń portqa kirme telimderi tegistelýde. Munde 4 mıllıon tekshe metr jer qabatyn alý qajettiligi baıqalady. Qazirdiń ózinde qurylysshylar 1 mıllıon 150 myń tekshe metr topyraq shyǵaryp, jumystyń 30 paıyzyn oryndady. Jerdiń qatty qabatyn jarý tásilderi qoldanylýda.

Quryq porty Aqtaýdan júz shaqyrym jerde ornalasqan. Sondyqtan da munda Borjaqty-Ersaı temir jol jelisi tóseldi. Jańa temir jol jelisimen alǵashqy jumysshy poıyzdaryn Memleket basshysy shildede iske qosty. Qazir bul jolmen qurylys zattary, parom keshenine qajetti aýyr qorapty qaýsyrmalar, basqa da taýarlar otandyq jáne sheteldik kásiporyndardyń suranysy boıynsha jetkizilýde. Taıaý arada Ersaı stansasynan Quryq portyna 14,7 shaqyrymdyq kirme joldary salynatyn bolady.

Jylyna tórt mıllıon tonna júk ótkize alatyn parom kesheni halyq tutyný taýarlaryn, astyq, munaı ónimderi, suıytylǵan gaz, tyńaıtqysh basqa da júkter tasymaldaıdy. Porty tolyq qýatynda iske qosý úshin 250 adam turaqty jumysqa qabyldanady.