Iran Islam Respýblıkasynyń Mazandaran, Gúlistan, Tegeran, Tabrız, Horasan Razavı aımaqtarynan jáne Meshhed qalasynan kelgen taýar óndirýshi kompanıalar tórt kúnge sozylatyn kórmede munaı-gaz ónerkásibi men munaı-hımıa zaýyty, avtokólik ónerkásibi baǵytyndaǵy taýarlardy, qurylys materıaldary men ınjenerlik-tehnologıalyq qyzmetterdi, aýylsharýashylyǵy kólikteri men qurylǵylaryn, sonymen birge tamaq ónimderi men kir jýǵysh untaqtaryn usynbaq.

- «Ózderińiz biletindeı, Mańǵystaý oblysy men Iran Islam Respýblıkasy aımaqtary arasyndaǵy ózara tıimdi seriktestik qatynastar 2009 jyly bastalǵan bolatyn. Mańǵystaý oblysy men Iran Respýblıkasy arasyndaǵy saýda-ekonomıkalyq qatynastardy odan ári damytýǵa jáne ınvestısıalardy tartýǵa baǵyttalǵan búgingi kórme de sonyń bir qorytyndysy bolyp otyr. Eki eldiń iskerlik qarym-qatynastarynyń arqasynda Kaspıı mańy elderiniń arasyndaǵy ózara árekettestik deńgeıiniń ósetinine senimdimin. Iran Islam Respýblıkasymen jasasqan saýda-ekonomıkalyq qatynastar ırandyq bıznestiń de, qazaqstandyq bıznestiń de damýyna zor yqpal etedi dep oılaımyn», - dep atap ótti kórmeniń ashylý saltanatynda Mańǵystaý oblysynyń ákimi Alık Aıdarbaev.

22 shildege «Atameken» óńirlik kásipkerler palatasy men Mazandaran aımaǵynyń aýylsharýashylyǵy men shahta, saýda jáne ónerkásip Palatasy arasyndaǵy yntymaqtastyq týraly memorandýmǵa qol qoıylatyn «Mańǵystaý oblysy men Iran Islam Respýblıkasy aımaqtarynyń ınvestısıalyq múmkindikteri» atty ekijaqty bıznes-forým ótkizý josparlanyp otyr.

Mazandaran aımaǵyn basqarýshy gýbernator Rabıe Fallahtyń bastaýymen kelgen ırandyq bıznesmender delegasıasy Mańǵystaý oblysyndaǵy birqatar iri kásiporyndarmen, atap aıtqanda, «Aqtaý teńiz porty» arnaıy ekonomıkalyq aımaǵymen, Kendirli demalys orynymen jáne oblystyń ónerkásip nysandarymen tanysady.