Mańǵystaý oblysynda 2015 jyly 500 myń sharshy metr turǵyn úı paıdalanýǵa berilmek. Bul týraly Mańǵystaý oblysy qurylys basqarmasynyń basshysy Oraq Aıapov habarlady.

«2015 jyly, tutastaı, 500 myń sharshy metr úı salý josparlanýda, onyń ishinde Mańǵystaý oblysynda 1080 sharshy metr jalǵa beriletin úı, Aqtaý qalasynda 66992 sharshy metr kredıttik turǵyn úı salynady. 32a shaǵyn aýdanynda 5580 sharshy metr - jas otbasylarǵa arnalǵan 120 páterlik 2 turǵyn úı, 426 348 sharshy metr komersıalyq jáne jeke turǵyn úı salynady», - dep habarlady Oraq Aıapov.

Onyń aıtýynsha, aǵymdaǵy jyly áleýmettik sala nysandaryn salýǵa  9 mlrd 571 mln. teńge bólingen. 2014 j. bastalǵandardy aıaqtaýǵa, jańa bilim berý nysandaryn salýdy bastaýǵa 7 mlrd. 144 mln. teńge bólindi.

«2014 jyly 6 orta mektep, 15 balabaqsha, basqa nysandar qurylysyna 5 mlrd. 850 mln. teńge bólindi. Ótken jyldyń qorytyndysy boıynsha barlyq qarajat ıgerilip, paıdalanýǵa 3 bilim berý mekemesi engizildi. Bıyl 3 orta mektep, 13 balabaqsha salý josparlanǵan», - dedi qurylys basqarmasynyń basshysy.

Oblysta densaýlyq saqtaý nysandaryn salýǵa 2014 jyly 588, 933 mln teńge bólindi, onyń respýblıkalyq búdjetten bólingen 385 mln teńgeden astam somasy Aqtaý qalasy Óńirlik ana men balany qorǵaý ortalyǵyn salýǵa baǵyttaldy. Jergilikti búdjetten 200 mln. teńge 7 dárigerlik ambýlatorıa, 1 feldsherlik-akýsherlik pýnkt salýdy bastaýǵa jumsaldy. 2015 jyly osy nysandardy salýdy jalǵastyrýǵa 1 mlrd. 675 mln. teńge kózdeldi. 7 dárigerlik ambýlatorıa, 1 feldsherlik-akýsherlik pýnkt paıdalanýǵa engizildi. Óńirlik ana men balany qorǵaý ortalyǵyn salý kelesi jyly jalǵasady.

5 mádenıet jáne sport nysany qurylysyna jergilikti búdjetten  751,775 mln. teńge bólindi. 

Aqparat kózi: İnform.kz.