Mańǵystaý oblysyndaǵy kóńil marqaıtar jetistikter týraly «Qamshy» az jazbady. Endi mine, óńirdegi shaǵyn jáne orta bıznes týraly sóz qozǵamaqpyz.

Shaǵyn jáne orta bıznes belsendi damyǵan jerde ekonomıka ornyqty bolmaq. Tek bıylǵy jyldyń 7 aıynda óńirde 4 myń kásipker óz isin ashty. Bulardyń úlesi halyqtyń ekonomıkalyq belsendi tobynyń qurylymynda 43 paıyzǵa deıin ósti. Eger «Bıznestiń jol kartasy – 2020» baǵdarlamasy arqyly shaǵyn jáne orta bıznestiń bastamashylyǵy qoldaý tapsa, al shaǵyn bıznestiń bastamashylyǵy «Jumyspen qamtý – 2020» Baǵdarlamasy aıasynda júzege asady. Baǵdarlamany iske asyrý bıylǵy jyldyń 1 shildesinen bastaldy. «Biraq, ázirge ony qorytyndylaý erterek. Barlyq aýdandar men qalalarda daıyndyq jumysy júrgizildi, jumyspen qamtý ortalyqtary quryldy. Óz betimen jumyspen qamtylǵandar men halyqtyń jumyssyzdar tobynyń qatarynan Baǵdarlamaǵa yqtımal qatysýshylar anyqtaldy, basymdylyq kásiptik mamandyqtardyń tizbesi qurylyp, osy mamandyqtar boıynsha kásiptik oqytý júzege asyrylatyn bolady»,— deıdi ákimshilik.

Densaýlyq, bilim berý salasy

Oblys ákimdigi Bilim jáne ǵylym mınıstrligimen birlesip 2015 jylǵa deıin qandaı mektep, qaıda salynatyny jóninde naqty sheshim de shyǵaryp qoıdy. Óńirde aldaǵy 4-5 jylda barlyǵy 15 myń oryndyq 18 mektep salý kózdelip otyr. Onyń ishindegi ekeýiniń qurylysy (Jańaózen qalasyndaǵy 1200 oryndyq jáne Munaıly aýdanynyń Atameken aýylyndaǵy 640 oryndyq mektepter) bıyl aıaqtaldy. Qaraqıa aýdanynyń Jetibaı kentindegi, Munaıly aýdanynyń Batyr jáne Mańǵystaý aýyldaryndaǵy barlyǵy 2784 oryndyq úsh mekteptiń qurylysy qazir qarqyndy júrip jatyr. Mýltımedıalyq, lıngafondyq, pándik kabınettermen qamtamasyz etilý kórsetkishi 80 paıyzdan astam, bul respýblıka boıynsha Astana qalasynan keıingi ekinshi kórsetkish.

2015 jylǵa qaraı densaýlyq saqtaý salasy barynsha tıimdi, al halyqtyń sapaly medısınalyq qyzmetke qoljetimdiligi arta túspek. Baǵdarlamanyń negizgi baǵyttary bul — turǵyn halyqtyń, ásirese jastardyń arasyndaǵy syrqattardyń aldyn alýdy kúsheıtý, ana men bala densaýlyǵynyń máselelerinde júıeli sharalar qabyldaý. Bıylǵy jyldan bas -tap turaqty túrde aýyl turǵyndaryna konsýltasıalyq-dıagnostıkalyq kómek kórsetýge arnalǵan jyljymaly utqyr keshender jumys isteýde.

Nurzat Toǵjan