3 shilde kúni QR Premer-Mınıstriniń orynbasary Berdibek Saparbaev Mańǵystaý oblysyna jumys saparymen keldi.

Vıse-premer Berdibek Saparbaev 2013 jyly paıdalanýǵa berilgen Jańaózen qalasyndaǵy  «Ózenmunaıgaz» AQ jerasty qurylǵylaryn jóndeıtin sehtyń jumys jasaý barysymen tanysty. Qurylystyń jalpy quny – 4,79 mlrd. teńge. Nysanda aýmaǵy 9252 sharshy metr bolatyn ákimshilik-turmystyq korpýs pen óndiristik seh ornalasqan. Qurylǵylardy qabyldaıtyn jáne jýatyn, sorǵy-kompressorlyq qubyrlardy,  sorǵy qarnaǵy men qarnaqty tereń sorǵylardy jóndeıtin jerde, daıyn ónim teliminde shamamen 350 adam jumys jasaıdy.

Óndiristik sehta jylyna 400 000 dana sorǵy-kompressorlyq qubyr, 300 000 dana sorǵy qarnaǵy, 10 000 birlik tereń qarnaqty sorǵylar jóndeledi.

Sehtyń jumysy jerasty qurylǵylarynyń jumys jasaý sapasyn arttyrýǵa, tereńdetilgen sorǵy qurylǵylarynyń paıdalaný merzimin uzartýǵa, jerasty sańylaýlaryndaǵy ekologıalyq qaýipsizdikti saqtaýǵa  baǵyttalǵan.

Berdibek Saparbaevtyń eńbek ujymymen kezdesýi kezinde jumys oryndaryn saqtap qalý úshin kásiporynnyń qabyldaǵan sharalary týraly, «Ózenmunaıgaz» AQ óndiristik qyzmetindegi máseleler talqylandy.

«ÓzenInvest» MKK aýyz sýyn tazalaý stansıasymen tanysý barysynda QR Premer-Mınıstriniń orynbasaryna kásiporynnyń aǵymdaǵy jumysy, ıaǵnı Jańaózen men jaqyn ornalasqan eldi mekenderdi aýyz sýymen qamtamasyz etý týraly baıandap berdi.

Anyqtama úshin: «ÓzenInvest» MKK sýmen jabdyqtaý júıesi aýyz sýyn tazalap, saqtap, tutynýshylarǵa tasymaldanýyn qamtamasyz etedi. Edil sýy sý qubyrynyń jelisi boıynsha jerasty sý qoımasyna quıylady da, «Degremon» fransýzdyq fırmasynyń MÝD-720 sý tazalaıtyn ǵımaratyna sorǵy stansıasynyń İİ kótergishi arqyly tazalanýǵa beriledi. Sý tazalaý tehnologıasy koagýlır men flokýlır (gıdrolız kezinde paıda bolatyn, súzbeıtin bóliginen sýdy tazalaý), zalalsyzdandyrý, súzý, koagýlır qaldyqtaryn tundyrý prosesteri júretin 4 kezeńnen turady.

Aýyz sýyna jaramdy deńgeıge deıin tazartylǵan, zararsyzdandyrylǵan sý «artezıan» sýymen birge taza sýdyń qoımasyna túsip, aralasady. Taza sý qoımasyndaǵy aýyz sýy sorǵy stansıasynyń İ kótergishindegi sorǵymen  sý qubyry jelisine tasymaldanady. Ortalyq laboratorıa arqyly analız úshin alynatyn sýdy suryptaý jumystary qatarlasa júredi.

Artyq sý qoryn 3 táýlikke deıin syıǵyza alatyn jumys jasap turǵan saıabaq qoımasy 45 myń adamǵa eseptelgen. Qala boıynsha jyl saıyn sý qubyry jelisine 2000-nan astam abonent qosylyp otyr. Abonent sanynyń kóbeıýi aýyz sýyna degen suranysty arttyrady. Sonymen birge, 2012-2020 jyldarǵa arnalǵan Jańaózen qalasynyń áleýmettik-ekonomıkalyq damýynyń Keshendi josparyna sáıkes, jeke sektordaǵy 7000 turǵyn úıdi qosý josparlanyp otyr. Jańaózen qalasy turǵyndarynyń kóbeıýine baılanysty qazirgi tańda 150 myń adamǵa eseptelgen úsh táýlikke arnalǵan sý qory qoımasy saıabaǵyna suranys artyp otyr.

Jańaózen qalasynda edil sýynyń jetkizilý kólemin táýligine 50 myń tekshe metrge deıingi kóterý úshin, edil sýyn táýligine 30 myń tekshe metrge deıin aýyz sý deńgeıine daıyndaý úshin, «Sý tazalaıtyn ǵımarat qurylysy» jobasyn iske asyrý úshin jáne Jańaózen qalasyndaǵy sýmen qamtamasyz etý máselesin sheshý úshin sý tazalaıtyn stansıasy shekarasynan jer telimi (2 ga) bólindi. Qazirgi ýaqytta atalmysh joba boıynsha qajetti jumystar júrgizilip jatyr.

Sonymen qatar Premer-mınıstrdiń orynbasary 2014 jyly paıdalanymǵa berilgen perzenthanaǵa bardy. Jańaózen qalasyndaǵy issapar barysynda Mańǵystaý oblysynyń ákimi Alık Aıdarbaev Jańaózen qalasyndaǵy Keshendi jospardyń oryndalýy jáne «Monoqalalardy damytý» memlekettik baǵdarlamasy týraly aıtyp berdi.

Kelesi tanysqan nysan Jańaózen qalasy, Rahat aýyly «Aqsý» shaǵyn aýdanyndaǵy 280 oryndy «Aıgólek» atty № 12 balabaqsha boldy. Mektepke deıingi balalar mekemesiniń oqý kabınetteri arnaıy qural-jabdyqtar jáne jıhazdarmen jasaqtalǵan. Mektepke deıingi bilim sapasyn jaqsartý maqsatynda balabaqshada akt zaly men mýzykalyq zal, kıim bólmeleri, oqytýshylar men balalardy dárigerlik tekseristen ótkizetin kabınet, medısınalyq personalǵa arnalǵan bólme qarastyrylǵan. Ǵımarattyń 1-nshi qabatynda arnaıy kirý esigi bar as ázirleıtin bólik ornalasqan. Asqana tárbıeshiler men qyzmetshilerdi ortaq, dıetalyq jáne emdik-profılaktıkalyq tamaqtarmen qamtamasyz etýge eseptelgen.

QR Premer-Mınıstriniń orynbasary Berdibek Saparbaev Aqtaý qalasynda kásiporyndar men Mańǵystaý oblysynyń ákimshiligi arasynda jumyspen qamtý jáne qazaqstandyq túsinik boıynsha jasalǵan memorandýmdardy júzege asyrý máseleleri týrasynda jınalys ótkizdi. 

Mańǵystaý oblystyq aýrýhanadaǵy kardıohırýrgıalyq bólimdi aralaý kezinde Vıse-premer Mańǵystaý oblysyndaǵy kardıohırýrgıanyń damýymen jáne jańa kardıohırýrgıalyq ortalyqtyń múmkindikterimen tanysty.

QR Premer-Mınıstriniń orynbasary Berdibek Saparbaevtyń basshylyǵymen Sh.Esenov atyndaǵy Kaspıı memlekettik tehnologıalar jáne ınjınırıń ýnıversıteti ǵımaratynda oblystaǵy áleýmettik salany  damytý máselesine qatysty jınalys ótkizdi.

Sodan keıin Berdibek Saparbaev sport saraıy men Nazarbaev zıatkerlik mektebiniń qurylystarymen tanysty.

120 oryndy jatyn korpýstary bar 720 oqýshyǵa arnalǵan jańa «Hımıa-bıologıalyq baǵyttaǵy Nazarbaev zıatkerlik mektebi» Aqtaý qalasyndaǵy 33 shaǵyn aýdanynda turǵyzylyp jatyr. Bul nysan aǵymdaǵy jyldyń shilde aıynda paıdalanýǵa beriledi dep josparlanýda.

Aqtaý qalasynda 2014 jyly bastalǵan kóp fýnksıonaldy-sporttyq keshenniń qurylysyna 3 081 mln. teńge bólindi.

Mańǵystaý oblysynyń áleýmettik salasynyń damýyna 2015 jyly 10,5 mlrd. teńge bólindi, onyń ishinde respýblıkalyq búdjetten 4,7 mlrd. jáne jergilikti búdjetten 5,7 mlrd. teńge. Mańǵystaý oblysynyń áleýmettik salasynyń damýyna 2014 jyly 7,6 mlrd. teńge bólingen, onyń ishinde respýblıkalyq búdjetten 2,5 mlrd. teńge jáne jergilikti búdjetten 5,1 mlrd. teńge.

Aqparat kózi: Mańǵystaý oblysy ákiminiń baspasóz qyzmeti.