Dúnıejúzilik densaýlyq saqtaý uıymynyń (DDSU) málimeti boıynsha, koronavırýspen aýyrǵan adam vırýsty ekinshi ret taǵy da juqtyrýy múmkin. Bul týraly Qamshy tilshisi Bloomberg aqparatyna silteme jasap habarlaıdy. 

Birikken Ulttar Uıymynyń 24 sáýirdegi málimdemesinde: «Kovıd-19-dan saýyqqan, ımýnıteti qalyptasqan adamdardyń ekinshi ret vırýs juqtyrmaıtyny týraly qazir eshqandaı dálel joq», - delingen.

DDSU aıtýynsha, keıbir elder koronavırýsqa qatysty jańsaq sheshimder qabyldaýda. Birneshe respýblıka vırýsqa qarsy “antıdeneleri bar adamdar” úshin saparǵa nemese jumysqa oralýǵa múmkindik beretin «ımýnıtet pasporty» nemese «vırýstyń qaterine qarsy sertıfıkat» berýdi usynǵan. Alaıda, DDSU aqparaty boıynsha, mundaı sertıfıkat alǵan adamdar densaýlyq saqtaý nusqaýlaryn elemeı, aýrýdyń odan ári taralý qaýpin arttyrýy múmkin.

Bir qyzyǵy, Chılı birinshi bolyp ımýnıtettik kartalardy shyǵaratynyn jarıalap úlgergen. Bul mamandar úshin alańdaýshylyq týǵyzýda, sebebi, keıbir testiler senimsiz bolyp shyqqqan, tipti, "keıbireýler kartany alý úshin ádeıi aýyryp qalýy múmkin" deıdi DDSU. AQSH jáne basqa elder soǵan qaramastan, bul nusqany qarastyryp jatqanyn jarıalaǵan.