Koronavırýs indetinen kóz jumǵan naýqastardyń ólimine sozylmaly syrqattary da sebepker bolýda. Bul týraly Almaty qalasynyń Memlekettik bas sanıtarlyq dárigeri Jandarbek Bekshın onlaın-brıfıngte aıtty.

– 24 sáýirdegi jaǵdaı boıynsha ınfeksıadan 8 adam kóz jumǵan. Jasy 56-89 jas aralyǵyndaǵy 4 er jáne 4 áıel. Ortasha jastary – 66. Olarda qant dıabeti, semizdik, júrektiń ıshemıalyq aýrýy, arterıalyq gıpertenzıa, baýyr sırrozy sıaqty sozylmaly keselderi bolǵan. Ólim-jitim jaǵdaıyn zerdeleý maqsatynda qalada arnaıy komısıa qurylǵan. Komısıa músheleri tarapynan taldaýlar júrgizilip, ólimniń negizgi sebebi anyqtalady. Qaıtys bolǵan 5 naýqastyń ólimine sozylmaly aýrýlary sebepker bolǵan.  Infeksıadan saýyǵyp shyqqandardyń arasynda eki jaqty pnevmonıamen aýyratyndar boldy, ol naýqastardy emdeý kýrsy 14 kúnnen asyp jyǵyldy.  Sozylmaly aýrýlary bar naýqastardyń arasynda qaterli ınfeksıadan emdelip shyqqandar qazirgi tańda olar ambýlatorıalyq-emhanalyq qyzmet ókileriniń jiti baqylaýynda, – dedi J.Bekshın.

Sondaı-aq, spıker indet oshaǵy bolyp sanalatyn Ortalyq qalalyq klınıkalyq aýrýhanasynda atqarylyp jatqan saýyqtyrý sharalaryna toqtalyp ótti.

– Ortalyq qalalyq klınıkalyq aýrýhanasy jabylǵan kúnnen bastap biz onda saýyqtyrý is-sharalaryn júrgizip jatyrmyz. Birinshi kezekte zalalsyzdandyrý jumystaryna mán beriledi. Keshe dezınfeksıalaý jumystyranyń birinshi kezeńi aıaqtaldy. Usaq dıspersti búrký ádisterimen barlyq palata, emdeý-emshara jasaý bólmeleri, jalpy ǵımarat túgel dezınfeksıalandy. Búgin ekinshi kezeńi bastaldy. Sondaı-aq, jeldetý júıeleri zalalsyzdandyryldy. Ǵımarat kezeń-kezeńimen, tolyǵymen dezınfekıalanyp bitken soń, munda tek ınfeksıa juqtyrǵan naýqastar ǵana qabyldanatyn bolady. Eger qazirgideı tótenshe jaǵdaı májbúrlep jatsa, bul nysan provızorlyq ortalyq retinde de paıdalanylýy múmkin, – dedi J.Bekshın.