Ońtústik Qazaqstanda ótip jatqan úsh kúndik «Astana kúnine tartý — 75 nysan» aksıasy aıasynda Ordabasy aýdanynda eki áleýmettik nysan ashylyp, el ıgiligine berildi.

Aldymen Temirlan eldimekenindegi kásipkerlerge qyzmet kórsetý ortalyǵy men kásipkerlik mektebiniń ashylý saltanaty ótti. Oǵan oblystyq kásipkerlik, ındýstrıaldy-ınnovasıalyq damý jáne týrızm basqarmasynyń basshysy Baýyrjan Omarbekov, aýdan ákimi Samat Saparbaev qatysyp, barsha turǵyndardy merekemen quttyqtady.

Bul eńseli ǵımarat oblys ákiminiń tapsyrmasymen barlyq aýdan, qalada Prezıdenttiń shaǵyn jáne orta kásipkerliktiń damýyn jańa deńgeıge shyǵarý boıynsha tapsyrmasynyń aıasynda júzege asyp otyr. Kásipkerlerge sapaly qyzmet kórsetin bul ortalyqta «bir tereze» qaǵıdasy negizinde memlekettik qoldaý quraldary boıynsha qyzmet kórsetilýde.

Búgingi tańda kásipkerlerge qyzmet kórsetý ortalyǵynda ruqsat qujattaryn rásimdeý, kásipkerlerdi oqytý, sondaı-aq, servıstik qyzmet kórsetý baǵyttary boıynsha jumystar atqarylýda. Aýdanda shaǵyn jáne orta kásipkerlik sýbektileriniń sany segiz myńnan astam.

Mereke qarsańynda sonymen qatar Bórjar aýyldyq okrýginde 120 oryndy «Myńbala» bóbekjaı balabaqshasy esigin aıqara ashty. «Balapan» baǵdarlamasy aıasynda ashylǵan jańa ǵımaratta úlken ári yńǵaıly balalar bólmesi, jatyn oryn bólmeleri barlyq zamanaýı quraldarmen jasaqtalǵan.

Nysannyń qurylysyna oblystyq búdjetten 235 mıllıon teńge bólingen. Bóbekjaıda 36 adam jumyspen qamtyldy.

Jalpy, aýdanda 15 memlekettik, 19 jekemenshik balabaqsha men mektep janyndaǵy 21 shaǵyn ortalyq el ıgiligine jumys jasaýda. Onda 5500 bala tárbıelenýde. Aýdannyń mektepke deıingi tárbıemen qamtý kórsetkishi búgingi tańǵa 76 paıyzdy quraıdy. Jyl sońyna deıin mektep janynan taǵy 3 shaǵyn ortalyq, 4 jekemenshik balabaqsha iske qosylady dep kútilýde.

OQO ákiminiń baspasóz qyzmeti