Almaty. Qamshy portaly - Ońtústik Qazaqstan oblysy elimizdegi týý kórsetkishi men kóp balaly analar jóninen ózge aımaqtarmen salystyrǵanda kóshi ilgeri turatyny týraly osyǵan deıin de saıtymyzda jazǵan bolatynbyz. Qazirgi kúnniń ózinede jalpy, Ońtústik Qazaqstan oblysynda 152358 kópbalaly ana bar eken. Jergilikti bılik pen memlekettik uıymdar óńirdegi kóp balaly analardy qurmettep, túrli syı-syapat úlestirip turýdy úrdiske aınaldyryp alǵandaı. Mysaly, ótken joly Ońtústik Qazaqstan oblystyq Qazaqstan halqy Assambleıasy hatshylyǵynyń meńgerýshisi Tursynkúl Qurmanbaeva óńirdegi altyn qursaqty analarǵa qurmet kórsetken.
Onyń 30046-sy Altyn alqa ıegeri bolsa, 38824-i Kúmis alqa taqqan. Al bul kúni 63 myńǵa jýyq anaǵa syı-qurmet kórsetildi. Qazaqstan halqy Assambleıasynyń ońtústiktegi ókildigi qazaq jerinde urpaq órbitip, eldiń aýyzbirshiligine uıytqy bolyp, tatýlyǵy men birligin jarastyryp otyrǵan ózge ult ókilderiniń aq jaýlyqty analaryna syı-sıapat usyndy.
7 ul-qyzdan 25 nemere súıip otyrǵan Madınat Omarova mundaı qurmetke rıasyz alǵysyn bildirip, qazaq halqynyń keńpeıil, darqan minezin erekshe atap ótti.
«Qıyn-qystaý kezde óz jerinen oryn berip, qushaǵyn aıqara ashqan qazaqstandyqtarǵa rızashylyǵym mol», - dedi Altyn alqa ıegeri.
Al Parahat Hodjımetova 21 nemereni baǵyp qana qoımaı, jeke kásipkerlikpen de aınalysady. Ol quttyqtaýshylarǵa alǵysyn bildirip, eldiń tynyshtyǵy men tatýlyǵyna syzat túspeýin tilep, aq batasyn berdi, dep jazady "Aıqyn" gazeti.
Derekkózi: QazAqparat
