Almaty. Qamshy portaly - Elbasy N.Nazarbaevtyń Jarlyǵyna sáıkes 2010 jyldyń qańtarynan bastap,  jeti bala tárbıelep otyrǵan analar «Altyn alqa» ala bastaǵany belgili.  Al, «Kúmis alqa» burynǵydaı 8 bala emes, 6 balasy barlarǵa beriletin boldy. Sodan beri birshama ýaqyt ótti. Ońtústiktegi altyn qursaqty analardyń qanshasy omyraýlaryna «Altyn»  nemese «Kúmis alqa» taqty? Memleketten beriletin járdemaqyny qansha keıýana tolyqqandy paıdalanyp otyr? Tıisti basqarmalar men bólimderge habarlasyp, osy saýaldarǵa jaýap alǵan bolatynbyz. Endeshe... 

Zeınetaqy tóleý jónindegi memlekettik ortalyqtyń Ońtústik Qazaqstan oblystyq fılıalynyń bergen málimetterine súıensek, 2010 jyly «Altyn alqamen», «Kúmis alqamen» jáne «Batyr ana» ataǵymen, 1-2 dárejeli «Ana dańqy» ordenderimen 25 myń 789 ana nagradtalypty. Onyń ishinde 617 ana «Altyn alqa» tósbelgisin taǵynsa, 4389-y «Kúmis alqamen» marapattalǵan. Al, bıyl oblysymyz boıynsha 7 bala ósirgen 15 myń 671 ana 6 aılyq eseptik kórsetkish kóleminde, ıaǵnı 9 myń 240 teńge memlekettik járdemaqy alyp otyr. Qursaǵynan 6 bala ósirgen 32 myń 113 áıel  «Kúmis alqa» tósbelgisiniń sharapatyn kórýde. Jalpy, óńirimizde qos alqanyń járdemaqysyn 47 myń 784 kópbalaly ana ıgiligine jaratýda eken.  

2010 jyldyń 1 qańtarynan bastap atalaǵan marapat ıegerleri, sondaı-aq, buryn «Batyr ana» ataǵyn alǵan áıelder nemese 1 jáne 2 dárejeli «Ana dańqy» ordenimen marapattalǵandar arnaıy memlekettik járdemaqy alady. Ol, 6 aılyq eseptik kórsetkishti quraıdy nemese 8478 teńge kóleminde beriledi, — deıdi ortalyqtyń zańdy jáne jeke tulǵalarmen jumys júrgizý bóliminiń bastyǵy Raýshan Anarbekova.  

Munymen qosa, kópbalaly analar birqatar áleýmettik jeńildikterge de, atap aıtqanda, 53 jasynda zeınetkerlikke shyǵýǵa, sonymen qosa, memlekettik turǵyn úı qorynan baspana alý quqyǵyna  ıe bola alady. 

Jasyratyny joq, oblysymyzda osy  kúnge  deıin jeńildikti ala almaı otyrǵan analar azaıar emes. Olardyń arasynda 7 bala týyp-ósirgen,  alaıda, bir balasy qaıtys bolyp nemese isti bolýyna baılanysty memlekettik járdemaqydan qur qalǵandary da bar. Osy sekildi túıtkilderdi sheshýde oblystyq zeınetaqy tóleý jónindegi memlekettik ortalyq  arnaıy zań talaptaryna súıene otyryp jumys istep keledi.  

— Biz   memlekettik nagradalar týraly Zańnyń erejelerine súıene otyryp jumys atqaramyz. QR 1995 jylǵy 12 jeltoqsanyndaǵy №2676 zańy boıynsha «Altyn alqamen» jeti nemese  odan da kóp bala týǵan jáne tárbıelep ósirgen analar marapattalady. Bul shara ananyń jetinshi balasy bir jasqa jetken kezden ne  balalary tiri bolǵanda ǵana júrgiziledi, — deıdi Raýshan  Imanáliqyzy.

Sondaı-aq, analardyń Qazaqstan Respýblıkasynyń múddelerin qorǵaý kezinde nemese ózge qyzmettik mindetterin atqarý ústinde qaza tapqan ne bolmasa habarsyz ketken balalary esepke alynady. Dúleı apattar kezinde  adam ómiri men materıaldyq qundylyqtardy qutqarý jóninde azamattyq boryshyn atqarý ústinde, qylmysqa qarsy kúreste, qoǵamdyq tártip kúzetinde qaza tapqan balalary eskeriledi. Bul atalǵan zańnyń 28-babynda naqty kórsetilgen. Dál osy talaptar «Kúmis alqadan» úmitker 6 balaly analarǵa da qatysty.  

Kópbalaly analardy nagradtaýdy Prezıdent júzege asyrady. Iaǵnı, kýálikke Elbasynyń ózi qol qoıady.  Eger analar tósbelgisi men «Altyn alqa» nemese «Kúmis alqa» ıegeri ekenin rastaıtyn káýligin qolyna alyp jatsa, zeınetaqy tóleý jónindegi memlekettik ortalyqqa baryp,  aryzdanýy tıis. Sonda ǵana analarǵa tıisti memlekettik járdemaqy taǵaıyndalady. 

Oblys ákimi apparatynyń nagrada jónindegi bas ınspektory Dına Rahmetýllaevanyń aıtýynsha, búgingi kúnge deıin 55 myń 495 kópbalaly ananyń qujaty Astanaǵa joldanypty. Nátıjesinde 54 myń 415 ońtústiktik ana «Altyn» jáne «Kúmis alqa» kitapshalary men tósbelgilerin alǵan. 1080  ananyń qujaty elordaǵa jol tartypty.  Óskemen qalasyndaǵy moneta jasaıtyn zaýyttyń úlgere almaı jatqandyǵynan 5-6 myńdaı altyn qursaqty ana tósbelgilerine qol jetkize almaı otyrǵan jaıy bar. 

Alaıda, bul olqylyq analardyń memlekettik járdemaqy alýyna  eshbir kedergi keltirmeıdi. Óıtkeni, olar qoldaryna tıgen kitapshamen de tıisti mekemelerge baryp, járdemaqy ala berýine bolady, — deıdi Dına Nımatýllaqyzy. 

Statısıkalyq málimetterge súıensek, elimizde 200 myńdaı altyn qursaqty ana bar. Sonyń 55 myńnan astamy Ońtústikte ǵumyr keshýde.  

Aqparat kózi: Ońtústik Qazaqstan