Shymkentte «Áıel jáne bıznes» atty VIII aımaqtyq konferensıa ótti. Qalamyzda jańadan ashylǵan «Rixos Khadisha Shymkent» qonaqúıinde Taraz, Qyzylorda, Túrkistan jáne Taldyqorǵan qalalarynan kelgen 120-dan astam kásipker áıel bas qosty. Sonymen qatar, mıkroqarjylandyrý salasynyń sarapshylary, qarjy uıymdarynyń ókilderi jáne memlekettik qyzmetkerler qatysty. Konferensıa bıyl «Bıznes toleranttylyqty tańdaıdy» degen ataýmen ótti. Bul týraly «Qamshy» portaly shymkala.kz saıtyna silteme jasaı otyryp habarlaıdy.

İs-sharany mıkroqarjy uıymy, «KMF-Demeý» qarjy uıymy, Qazaqstan halqy Assambleıasy, Qazaqstannyń İsker Áıelder qaýymdastyǵy, OQO ákimi janyndaǵy áıelder isteri jáne otbasylyq-demografıalyq saıasat jónindegi komısıa uıymdastyrdy. Maqsat – áıelderdiń bıznestegi belsendiligin arttyrý, qatysýshylarǵa ózekti máselelerdi talqylaýǵa múmkindik jasaý, kásibin endi bastaǵandar úshin baǵyt-baǵdar berý jáne iskerlik qarym-qatynasty ornatý. 
Aımaqtyq konferensıany OQO ákiminiń orynbasary Erbol Sadyr ashyp, búgingi tańda áıelderdiń tek otbasynyń ǵana uıytqysy emes,  bızneste de bıik shyńdardy baǵyndyrǵanyn, sońǵy ýaqytta óndiris salasynda da aıanbaı eńbektenip júrgenin aıta kele, kóktem merekesimen quttyqtady. Sonymen qatar, mıkroqarjy uıymy tóraǵasynyń orynbasary Gúlmıra Ábenova, OQO isker áıelder qaýymdastyǵynyń tóraıymy, oblystyq áıelder isteri jáne otbasylyq-demografıalyq saıasat jónindegi komısıanyń múshesi Quralaı Bıkenova syndy birqatar azamatshalar sóz alyp, oı-pikirlerin ortaǵa saldy. 
Konferensıa barysynda otbasy bıznesiniń erekshelikteri men múmkindikteri, jastar kásipkerligi máseleleri qaralyp, ýaqytty utymdy basqarý jóninde trenıń ótti. İs-shara sońynda qatysýshylarǵa sertıfıkattar tabystaldy. 

Derekkózi: shymkala.kz