Keshegi oqý jylynda elimizdiń birqatar aımaǵynda oqýlyq máselesi úlken problemaǵa aınalǵan bolatyn. Bilim jáne ǵylym mınıstrligi barlyq oblystaǵy mektepterde kitap máselesi sheshilgen, oqýshylar túgel onymen qamtylǵan dep málimdegenimen, iske kelgende olaı bolmaı shyqqany esimizde. Oqýlyq jetispeýshiligi ásirese Ońtústik Qazaqstan oblysynda qatty sezildi. Bul problemany sheship, mektep shákirtterin tıisti kitaptarmen qamtamasyz etý úshin OQO ákimdigi bıyl qosymsha qarajat bólgendigin málimdep otyr. 

Keshe QR BǴM bilim jáne ǵylym salasyndaǵy baqylaý komıtetiniń tóraǵasy Saıat Núsipov Shymkentte bolyp, óńirdiń jańa oqý jylyna daıyndyǵymen tanysyp qaıtty. Jergilikti bılik ókilderimen bolǵan jıynda tyǵyryqtan shyǵý joldary talqylandy.

Atalǵan jıynda baıandama jasaǵan oblystyq bilim, jastar saıasaty jáne tilderdi damytý basqarmasynyń basshysy Albına Elshıeva OQO-da oqýshylar sanynyń jyl saıyn artyp kele jatqanyn toqtalyp, oqýlyqtar men oqý-ádistemelik keshenderdi satyp alýǵa jergilikti búdjetten 1 mlrd 326 mln teńge bólingenin aıtty.

Qosymsha 1 mlrd 410 mln teńgeniń qajet ekeni anyqtalyp, onyń 925 mln teńgesi oblystyq qazynadan bólinse, qalǵan 484 mln 898 myń teńge aýdan, qalalardyń búdjeti esebinen sheshiledi. Sondaı-aq, oqýlyq ázirleıtin 12 baspamen 104 kelisimsharttyń túzilgeni habarlanyp, daıyn ónimdi tasymaldaýda kezdesetin máselelerge nazar aýdaryldy.

Jıyndy qorytyndylaǵan oblys ákiminiń orynbasary E.Aıtahanov oqýlyqtar máselesiniń 20 tamyzǵa deıin sheshilip, barlyq bilim mekemelerine tasymaldap berý jóninde jaýaptylarǵa naqty mindetter júktedi. Májilisten keıin aýdandar men qalalardaǵy bilim bólimderi oqýlyq daıyndaıtyn baspalarmen eki jaqty kelisim-shart jasasty.