Ońtústik Qazaqstan oblysynda «Mektepke jol» jalpy respýblıkalyq qaıyrymdylyq aksıasy aıasynda «Senim telefony»jumys isteıdi. Bul týraly búgin Shymkenttegi «Ońtústik» aqparat ortalyǵynda ótken brıfıńte Ońtústik Qazaqstan oblystyq bilim, jastar saıasaty jáne tilderdi damytý basqarmasynyń bólim basshysy Ǵalıa Júsipova aıtty, dep habarlaıdy «Qamshy» portaly Bnews.kz-ke silteme jasaı otyryp.

«2015 jyldyń 22 shildesi kúni «Ońtústik Qazaqstan oblysynda «Mektepke jol» jalpy respýblıkalyq qaıyrymdylyq aksıasyn 2015 jyldyń 1 tamyzy men 30 qyrkúıek aralyǵynda uıymdastyrý jáne ótkizý jónindegi is-sharalar» jospary ázirlendi. Osy josparǵa sáıkes, «Balalarǵa birge kómek bereıik!» uranymen «Mektepke jol» aksıasyn uıymdastyrý jáne ótkizý jónindegi oblystyq uıymdastyrý komıteti quryldy. Atalǵan uıymdastyrý komıtetiniń quramyna oblystyq bilim jastar saıasaty jáne tilderdi damytý, ishki saıasat jáne din isteri, jumyspen qamtýdy úılestirý jáne áleýmettik baǵdarlamalar jónindegi basqarmalary, ishki ister departamenti, oblystyq ata-analar komıtetiniń, aýdan, qala ákimderiniń orynbasarlary engizildi», - deıdi ol.

Ǵalıa Júsipova aımaqtaǵy barlyq aýdan, qala ákimdikteri men bilim bólimderine atalmysh aksıany uıymdasqan túrde ótkizý týraly oblys ákimi Asqar Myrzahmetov tarapynan tapsyrma berilgenin habarlady. 

«Aksıa barysynda azamattardyń ótinishterine jedel jaýap berý úshin «Senim telefondary» jumys isteıtin bolady», - dep atap ótti ol.