«Nur Otan»-nyń resmı saıtynda partıanyń Saıası keńesi bekitken, partıaishilik irikteýdi ótkizý erejesi jarıalandy. Buǵan deıin «Nur Otan» partıasynyń Lıderi Nursultan Nazarbaev 2020 jyldyń 17 tamyzy men 3 qazany aralyǵynda praımerız ótkizý týraly Qaýlyǵa qol qoıǵan bolatyn.

Erejege sáıkes, praımerızdiń mindeti – «Myqty lıderler – Myqty partıa» qaǵıdaty boıynsha shynaıy jáne myqty kóshbasshylardy partıa qataryna tartý, belsendi jáne bastamashyl azamattar úshin «áleýmettik lıft» qurý, eldi damytý máselelerin talqylaýǵa kópshilikti jumyldyrý, aımaqtardaǵy júıeli jumys úshin ózekti máselelerdi anyqtaý, sondaı-aq, kandıdattardyń jeke jaýapkershiligin arttyrý.

Partıanyń qundylyqtaryn ustanatyn jáne saılaý quqyǵy bar kez kelgen qazaqstandyq úmitker bola alady. Eger kandıdat partıa múshesi bolmasa, ol praımerızge qatysýshylardy tirkeý merzimi aıaqtalǵanǵa deıin partıa qataryna qosyla alady.

Kandıdattar bastaýysh partıa uıymynan jáne bir oblys, qala nemese aýdannan ózin-ózi usyný jolymen de qatysýy múmkin.

Parlament Májilisiniń qazirgi depýtattary da praımerızge kandıdat retinde partıalardyń oblystyq fılıaldarynyń, sondaı-aq Nur-Sultan, Almaty jáne Shymkent qalalarynyń konferensıalarynda jaryssózderge qatysa alady.

Úgit-nasıhat jumystaryn tikeleı kandıdattardyń ózderi júzege asyrady jáne ol partıa múshelerimen kezdesýlerdi, BAQ pen áleýmettik jelilerde maqalalar men jazbalar jarıalaýdy qamtıdy. Jaryssózderge qatysý barlyq kandıdattar úshin mindetti. Kandıdattar belgili bir eldi mekenderdiń máselelerin kásibı qyzmetke sáıkes sheshýge qatysty kózqarastaryn usynady.

Partıaishilik irikteý erejesinde daýys berý barysynyń ashyqtyǵyn qamtamasyz etý tetikteri qarastyrylǵan. Barlyq kezeńderdi Partıalyq baqylaý komıteti baqylaıdy. Al onyń quramyna partıa múshesi bolyp tabylmaıtyn qoǵam belsendileri de kiredi. Daýystardy sanaýdy ýchaskelik esep komısıalary ár kandıdattyń baqylaýshylarynyń qatysýymen júrgizedi.

Zańnamalyq ózgeristerge sáıkes, partıalyq tizimderde keminde 30% áıelder jáne 20%-y 35 jasqa deıingi jastar usynylýy kerek.

Praımerızdi ótkizý erejelermen tolyǵyraq partıanyń saıtynda tanysýǵa bolady.

Eske sala keteıik, keshe partıa Tóraǵasynyń birinshi orynbasary Baýyrjan Baıbek Facebook jelisindegi óziniń paraqshasynda, aldaǵy praımerız – bul Elbasy jarıalaǵan «Nur Otan» partıasyn «qaıta jandandyrýdyń» mańyzdy bóligi bolyp tabylatyn partıaishilik demokratıanyń zamanaýı tetikteriniń biri ekenin atap ótken edi.

Praımerızdiń negizgi maqsaty – barlyq deńgeıdegi máslıhattar men Parlament Májilisindegi tıimdi depýtattyq korpýsty odan ári qalyptastyrý úshin básekelestik negizde jańa kóshbasshylardy aıqyndaý.

Onyń aıtýynsha, aldaǵy praımerızde qazirgi trendter eskerilip, dástúrli daýys berýmen qatar onlaın-daýys berýdi de ótkizý josparlanyp otyr.

«Partıamyzdyń Lıderi Nursultan Nazarbaev atap kórsetkendeı, «partıalyq tizimderge halyqtyń ártúrli bóliginiń ókilderi, bedeldi, azamattardyń senimine ıe bolǵan otandastarymyz kirýi tıis». Áleýmettik partıalyq lıftti qamtamasyz etý – partıamyz úshin basty mindetterdiń biri. Sondyqtan partıa múshelerimen qatar qoǵam ómirine beı-jaı qaramaıtyn, daryndy da kreatıvti barsha qazaqstandyqty aldaǵy praımerızge belsendi qatysýǵa shaqyramyz», – dedi ol.