Bul týraly «Nur Otan» partıasy Tóraǵasynyń birinshi orynbasary Baýyrjan Baıbek Facebook jelisindegi óziniń paraqshasynda aıtty.

«Dostar!

Amerıkandyq sarapshy Djessı Djeın Dafftyń The Washington Times gazetinde shyqqan maqalasyn oqyp shyqtym. Bizdiń buqaralyq aqparat quraldarymyz onyń tolyq aýdarmasyn jarıalady. Saıasattanýshylar, jýrnalıser men blogerler buǵan qatysty óz pikirlerin bildirdi. Materıaldyń mazmunyn qaıtalap jatý artyq.

AQSH-tyń bedeldi basylymynda mundaı maqalanyń jarıalanýy bul eldiń óńirdegi qoǵamdyq-saıası ózgeristerge degen aıtarlyqtaı qyzyǵýshylyǵyn ańǵartady. «Nur Otan» partıasy aýqymdy qaıta jandanýdy júrgizip, óz praımerızin iske qosa otyryp, turaqty túrde demokratıany qoldap kele jatqanyn kórsetip otyr. Amerıkandyq sarapshy da osyny atap kórsetken.

Elimiz Táýelsizdigin alǵan sátten bastap ózin demokratıalyq, quqyqtyq, áleýmettik memleket retinde damytyp keledi. Qoǵamdyq-saıası qarym-qatynastardy lıberaldandyrýdyń qazirgi nátıjesi – Tuńǵysh Prezıdent, Elbasy N.Á. Nazarbaevtyń eńbegi.

Olar áýelden «Nur Otan» partıasy Lıderiniń 2015 jyly qolǵa alǵan Bes ınstıtýsıonaldyq reformasy men 100 naqty qadamda kózdelgen bolatyn.

Keıbir «sarapshylardyń» tujyrymyna qaramastan, proporsıonaldy saılaý júıesine kóshý partıalyq júıeniń damý prosesine jol ashyp, aldaǵy saılaýlarda sapaly partıalyq tizimderdiń rólin kúsheıtpek.

Elbasynyń tapsyrmasymen ótken jylǵy tamyzda «Nur Otan» «Senim. Dıalog. Bolashaqqa nyq qadam» atty partıany qaıta jandandyrý baǵdarlamasyn qolǵa aldy. Partıalyq kadrlyq rezervke pılottyq irikteý boıynsha aýqymdy jumys atqaryldy, Májilis pen máslıhattardaǵy depýtattyq fraksıalar jumysy jandandyrylyp, barlyq deńgeıde partıalyq jaýapkershilik kúsheıtildi. Aýqymdy deńgeıde partıanyń «qatary tazartyldy», kóptegen partıalyq komısıalar men bastaýysh uıymdar ońtaılandyryldy, «kórinim» úshin ótkiziletin is-sharalar sany qysqartyldy. Partıanyń qoǵamdyq qabyldaýlary, onyń ishinde onlaın-resýrstary arqyly halyqpen tikeleı komýnıkasıa jasaýdyń tıimdi júıesi jolǵa qoıyldy. Zertteýlerge sáıkes halyqtyń quqyǵyn qorǵaý máselesi boıynsha partıaǵa senim sottan keıin ekinshi orynda tur.

Memleket basshysy Q.K. Toqaev sabaqtastyq saıasaty aıasynda «halyq únine qulaq asatyn memleket» tujyrymdamasyna sáıkes eldiń qoǵamdyq-saıası salasyn lıberaldandyrý prosesine jańa serpin berdi. Bir jyl ishinde biraz zańdarǵa, onyń ishinde saılaýlarǵa qatysty ózgerister engizildi, áıelder men jastar úshin arnaıy kvotalar belgilendi, beıbit jıyndar uıymdastyrý men ótkizý talaptary jeńildetildi, sondaı-aq parlamenttik opozısıa mártebesi zańmen bekitildi.

Nátıjesinde qazirgi kezde Qazaqstanda saıasattanýshylar men sarapshylardy tolǵandyryp júrgen saıası jańǵyrýǵa qatysty barsha máseleler boıynsha eleýli ózgerister iske asyryldy. Partıalardyń básekelestigi úshin tıisti jaǵdaı jasaldy, bul demokratıaǵa qaraı evolúsıalyq turǵydan alǵa basýdy qamtamasyz etedi.

Partıamyzdyń aldynda úmitkerlerdi partıaishilik irikteý sharasy tur. Bul búkil el kóleminde alǵash ret ótkizilmek. Praımerızdiń mindeti – laıyqty ári myqty lıderderdi tartý jáne «Nur Otan»-nyń halyqtyq partıalyq tizimin qalyptastyrý. Bul rette belsendi áıelder men jastar aýqymdy deńgeıde barynsha qamtylmaq.

Básekelik irikteý úmitkerlerdiń jeke jaýapkershilikterin arttyryp, saılaýshylardyń senimine ıe bolǵan, bedeldi lıderlerdi anyqtaýǵa múmkindik beredi. Osylaısha bul partıalyq jeli boıynsha biregeı áleýmettik lıftke aınalmaq.

Amerıkandyq jáne ózimizdiń sarapshylardyń qatysýshylar arasyndaǵy jarıa debattardyń mańyzdylyǵyn atap ótýi kezdeısoq emes. Áleýetti úmitkerler arasyndaǵy debattar halyqty óńirlik jáne jalpyulttyq máselelerdi talqylaýǵa barynsha qatystyrýǵa múmkindik beredi.

Birqatar resýrstar men avtorlardyń elimiz týraly jaǵymsyz sıpattaǵy jarıalanymdardy yqylaspen taratyp, túsindirmeler jazyp, al mundaı maqalalardy eleýsiz qaldyratyny baıqalady.

Jalpy, bul jarıalanym – tranzıt jaǵdaıynda Qazaqstandaǵy qoǵamdyq-saıası prosesterdi lıberaldandyrý men «Nur Otan» partıasyn qaıta jandandyrý nátıjelerine sheteldikter tarapynan berilgen alǵashqy baǵalardyń biri.

Dafftyń tujyrymy qoǵamymyzdaǵy konstrýktıvti oı-pikirlermen úndes. Taıaýda belgili saıasattanýshylar men belsendiler «Nur Otan» jaqtastarynyń Lıgasyn qurý týraly málimdegeni belgili. Onyń maqsaty – praımerızdiń ashyq ótýine yqpal etý. Biz mundaı bastamalardy quptaımyz. Pandemıaǵa baılanysty ahýal turaqtanysymen Lıga ókilderimen kezdesý josparlanyp otyr. Sol kezde olardyń usynystaryn jan-jaqty talqylamaqpyz.

Partıa memlekettik Táýelsizdigimizdi nyǵaıtý, Qazaqstandy órkendetý sekildi qundylyqtarymyzdy bólise otyryp, praımerızge qatysatyn, elimizdi ári qaraı damytý boıynsha óz ıdeıalary men usynystaryn ortaǵa salatyn barsha azamatqa ashyq. Bıleýshi partıada partıaishilik báseke úshin barlyq qajetti jaǵdaı jasalǵan!» - dep jazdy Baýyrjan Baıbek.