Ulybrıtanıalyq zertteýshiler dınozavrlardy jer betinen joıyp jibergen janartaýlar emes, qaıta Jer sharyna soǵylǵan asteroıd ekenin anyqtaǵan. Jerge alyp asteroıd qulaǵan soń, dınozavrlardyń tuqymy quryp, nátıjesinde adamzattyń Jer sharyn ıeleýine qolaıly jaǵdaı paıda bolǵan. Bul týraly Qamshy tilshisi brıtanıalyq The Mirror gazetine silteme jasap habarlaıdy.

"66 mıllıon jyl buryn Meksıkanyń jaǵalaýlarynda Jerge qulaǵan asteroıd qusqa aınalǵan túrlerden basqa barlyq dınozavrlardy joıyp jiberdi" degen pikir bar.

Al keıbir zertteýshiler "úlken janartaýlardyń atqylaýy dınozarlardyń joıylýynyń naqty sebebi bolýy múmkin" dep boljaıdy.

Alaıda Londonnyń ımperatorlyq koleji, Brıstol Ýnıversıteti jáne London Ýnıversıteti Kolejiniń zertteýshileri tek asteroıd soqqysy ǵana planetada dınozavrlar úshin ómir súrýge qolaısyz jaǵdaı jasaı alatynyn dáleldedi.

London ımperatorlyq kolejindegi jetekshi zertteýshi doktor Alessandro Chıarenza: "Biz asteroıdtiń ondaǵan jyldar boıy muzdyq dáýir týǵyzatynyn jáne osy ekologıalyq áserler dınozavrlar úshin qolaıly ortany azaıtqanyn anyqtadyq. Al qarqyndy janartaýdyń atqylaýy kerisinshe jahandyq ekojúıeni buzatyndaı kúshti bolmaǵan... Bizdiń zertteýimiz boıynsha, sandyq turǵydan alǵanda, dınozavrlardyń tuqymy quryp ketýiniń jalǵyz naqty túsindirmesi – búkil álemde olar mekendeıtin jerler qystyń áserinen joıylǵan" deıdi.

Asteroıdtyń nemese výlkanızmniń klımatty ózgertetin kúshi bar-joǵyn anyqtaý úshin zertteýshiler ádettegideı klımattyń geologıalyq belgilerin jáne matematıkalyq modelderdi qoldandy.

Jańa zertteýde olar osy ádisterdi biriktirip, dınozavrdyń ár túriniń órkendeýi úshin qandaı ekologıalyq faktorlar, mysaly, jaýyn-shashyn men temperatýra qajet ekenin zerttegen.

Sodan keıin olar asteroıd soqqysynan nemese jappaı výlkanızmnen keıin álemde mundaı jaǵdaılar bolatynyn kartaǵa túsirip, tek asteroıd soqqysy dınozavrlardyń barlyq mekendeıtin jerlerin qurtyp jiberetinin anyqtaǵan.