İshki ister mınıstrligi Aqtaý qalasynda adam kóp jıylǵan janazaǵa qatysty tekseris jumystaryn bastady. Bul týraly mınıstrliktiń baspasóz qyzmeti habarlady.

İİM málimetinshe, Mańǵystaý oblystyq polısıa departamenti tıisti sharalardy der kezinde qolǵa almaǵan. Sonyń saldarynan qatań karantın kezinde tártip buzýshylyqqa jol berildi. Osyǵan baılanysty mınıstr qyzmettik tekseris ótkizýdi tapsyrdy.

"İshki ister mınıstri Erlan Turǵymbaev Aqtaý qalasyndaǵy jerleý rásimine adamdardyń kóptep jınalýyna qatysty qyzmettik tergeý sharalaryn ótkizýdi tapsyrdy" delingen habarlamada.

Mańǵystaý oblysynyń bas memlekettik sanıtar dárigerdiń qaýlysy boıynsha 3-17 tamyz aralyǵynda qatań shekteý sharalary engizilgen bolatyn.

Aıta keteıik, polısıa general-maıory, BQO polısıa departamentiniń basshysy Maqsuthan Áblázimov pen kásipker Baharıdın Áblázimovtiń anasy Bıbijamal Áblázimova 79 jasynda qaıtys bolǵan. Jerleý rásiminiń vıdeosy áleýmettik jelide keńinen tarady. Vıdeodan karantınge qaramastan jerleý rásimine júzdegen qala turǵyny jınalǵanyn kórýge bolady. Sondaı-aq tártip saqshylarynyń joldy jaýyp tastaýy adamdardyń narazylyǵyn týdyrǵan.

Oqıǵadan keıin aqtaýlyq belsendiler oblystyq polısıa departamentiniń bastyǵy general-maıor Janarbek Baqtybaev pen oblystyq densaýlyq saqtaý dárigeri Erǵalı Sydymanovtyń otstavkaǵa ketýin talap etýde.