Jańa kostúm, týflı men shash úlgisin birinshi qyrkúıekke daıyndaıdy. Bıyl dástúrli túrde saltanatty jıyn bolmasa da, bastaýysh synyp muǵalimi Dınara Jamanbalınova ádettegideı jańa oqý jylyna daıyndalady. Ol oqýshylarmen qashyqtyqtan tanysyp, beıneqońyraý arqyly balalarmen til tabysady.

– Oqýshylardyń tizimin aldym. Árbir balanyń qaı balabaqshaǵa barǵanyn jáne kimniń qandaı qyzyǵýshylyǵy baryn anyqtadym. Sonymen qatar oqýshylardyń osy kúnge deıin qol jetkizgen jetistikterimen tanysyp, jańa laıfhak oılap taptym. Laıfhak boıynsha balalar menimen beıne qońyraý arqyly tildesken sátte aty-jónderin qaǵazǵa jazyp qoıatyn bolady, - dedi Dınara Erlanqyzy. – Bul jaı ǵana dúnıe bolyp kóringenimen, birinshi synyp tabaldyryǵyn attaǵaly turǵan búldirshin úshin óte mańyzdy. Árıne, keıin balalardyń aty-jónin jattap alǵan soń olar bul qaǵazdardy qoldanbaıtyn bolady. Alaıda alǵashqy onlaın sabaqta osy ádisti qoldanamyz.

Birinshi synypqa baratyn balalardyń bári úı jaǵdaıynda bilim almaıdy. Ata-analardyń ótinishi boıynsha kezekshi synyptar jumys isteıdi. Onda 15 adamnan artyq adam bolmaıdy. Balalar barlyq qaýipsizdik sharalaryn saqtap, mektepke kele alady. Qazir pedagogtar onlaın rejımnen bólek, shtattyq rejımde bilim berý úshin sabaq kestesin yńǵaılastyrýda.

– Tórtinshi toqsanmen salystyrǵanda, osy joly mektep ujymy men ákimshiligine osy baǵytta sabaq berýge daıyndalýǵa ýaqyt boldy, – dedi «Daryndy balalarǵa arnalǵan mamandandyrylǵan valeologıalyq mektep» dırektory Natalá Ahaeva. – Bıylǵy oqý jylynda mektepke jóndeý jumystaryn júrgizip, jıhazdar men tehnıkalardy aýystyryp qana qoımaı, jańa oqytý júıesin pysyqtap úlgerdik. Jaz boıy pedagogtar vebınarlar, trenıńerge, konferensıalarǵa qatysyp, bilimderin shyńdady. Barlyǵy pandemıa kezindegi durys oqytýdyń mańyzy zor ekenin bir kisideı túsinedi. Men SHQO bilim basqarmasynyń atqarǵan zor jumysy úlken nátıje beretinine senemin. Óıtkeni, endi muǵalimder jańa oqý formasyna daıyn, - dedi Natalá Vasılevna.

Endi kitap pen dápterdiń ornyna oqýshylar úshin smartfon men kompúterdiń bolýy óte mańyzdy. Muǵalimderdiń kómegi arqyly balalar arnaıy baǵdarlamany jazyp, sol boıynsha úı tapsyrmasyn oryndap, bilim alady. Tapsyrmany durys oryndaýdan bólek, dedlaındy saqtaý mańyzdy ekenin aıta ketken oryndy. Árbir sabaq boıynsha berilgen tapsyrmany oryndaýǵa reglament belgilenedi. Keıin sol boıynsha balalarǵa baǵa qoıylady. Sondyqtan qashyqtyqtan oqý barysynda bosańsýǵa bolmaıdy.

Mektep psıhology Marına Zajıgınanyń aıtýynsha, balanyń baqylaýsyz qalyp, bosańsýyna jol bermeı, onyń oqýǵa degen jaýapkershiligin arttyrý kerek. 

– Klasstyń ortaq chatynda árbir balamen jeke sóılesý qajet. Balalar saǵat 8.15 baılanysqa shyǵýy kerek. Onlaın sabaq barysynda árbir balamen jumys jasalady. Eger oqýshy pándi oqytý kezinde barlyǵyn túsinse, + belgisin qoıý tıis. Bul balalarǵa olardyń árdaıym baqylaýda ekenin uǵynýǵa múmkindik beredi, - dedi Marına Zajıgına.

Osyndaı ádis-tásildi pedagog mamandar, bilim salasynyń sheneýikteri men ákimshiligi ortaq chattardy qoldanady. Muǵalimder de balalar sıaqty qashyqtyqtan oqytý jańa ádis bolǵandyqtan, mamandarǵa ata-analardyń qoldaýy qajet. Olardyń eskertýleri men usynystary pedagogıkalyq jınalystarda talqylanyp, onlaın oqytýdy tıisti ótkizýge septigin tıgizedi.