Búroda Memleket Basshysy Qasym-Jomart Toqaevtyń altynshy sesıanyń ashylýynda Qazaqstan halqyna arnaǵan Joldaýynda kórsetilgen basymdyqtaryn eskere otyryp, depýtattyq korpýs qyzmetiniń negizgi baǵyttary talqylandy.

Otyrysty ashqan Májilis Tóraǵasy Nurlan Nyǵmatýlın Memleket Basshysynyń alǵa qoıǵan mindetteriniń aýqymdylyǵana toqtalyp, olardyń sheshimi qazaqstandyqtardyń ómiriniń barlyq salalaryn jańǵyrtý jáne qarqyndy damytý úshin qajettigine nazar aýdardy. Sonymen birge, depýtattarǵa memlekettik basqarýdyń jańa modelin zańnamalyq qamtamasyz etý, kvazımemlekettik sektordaǵy reformalardy qoldaý, salyq zańnamasy men búdjettik saıasatty jetildirý máseleleri boıynsha jumys jasaý qajet ekenine toqtaldy. Jumystyń basym bóligi azamattardyń áleýmettik ál-aýqatyn jaqsartýmen, sonyń ishinde, densaýlyq saqtaý, bilim berý, balalardyń quqyqtaryn qorǵaý máselelerin sheshýmen baılanysty.

Nurlan Nyǵmatýlın atap ótkendeı, Prezıdent Joldaýy – eldi jańǵyrtýdyń jańa kezeńi.

Búro otyrysynyń kún tártibiniń jobasynda birqatar mańyzdy qujattardy jumysqa alý kózdelgen.

Atap aıtqanda, Ulttyq qordan 2021–2023 jyldarǵa arnalǵan kepildendirilgen transfert týraly, 2021–2023 jyldarǵa arnalǵan respýblıkalyq búdjet týraly zań jobalary bar.  Osylardyń qatarynda: ortalyq jáne jergilikti memlekettik organdar arasynda aýyzsýmen jabdyqtaýdy sýbsıdıalaý jónindegi ókilettikterdiń arajigin ajyratý máseleleri boıynsha túzetýler engizý týraly zań jobasy, sondaı-aq, «Tehnıkalyq retteý týraly» jáne oǵan ilespe zań jobalary bar.

Aldaǵy jalpy otyrysta «Erekshe taýarlardy baqylaý týraly» jáne oǵan ilespe zań jobalary boıynsha qorytyndy ázirleý merzimi belgilenetin bolady.

Sonymen qatar, jumysqa alynǵan qujattardyń qatarynda «Qazaqstan Respýblıkasynyń halyqaralyq sharttary týraly» zańyna ózgerister men tolyqtyrý engizý týraly jáne aqparat máseleleri boıynsha zań jobalary bar.

Osy kúni depýtattar birqatar ratıfıkasıalyq zań jobalaryn da jumysqa almaq. Atap aıtsaq, olar: EAEO týraly shartqa ózgerister engizý týraly hattama, Qazaqstan men Birikken Arab Ámirlikteri arasyndaǵy eki el astanalarynda elshilikterdiń jer ýchaskelerin óteýsiz paıdalanýǵa ózara berý týraly kelisim, Qazaqstan men Soltústik Makedonıa,  Bolgarıa, Koreıa jáne Birikken Arab Ámirlikteri elderi arasyndaǵy sottalǵan adamdardy berý sharttary týraly zań jobalar. Sondaı-aq, jumysqa qabyldanǵandar ishinde TMD qatysýshy memleketterdiń bas bostandyǵynan aıyrýmen baılanysty emes jazalardy oryndaýdy berý týraly konvensıa, sonymen qatar Qazaqstan Respýblıkasynyń Úkimeti men Bilim, ǵylym jáne mádenıet máseleleri jónindegi Birikken Ulttar Uıymy (IýNESKO) arasyndaǵy IýNESKO aıasynda Mádenıetterdi jaqyndastyrý halyqaralyq ortalyǵyn (2-sanat) qurý, EAEO sheńberinde aýyl sharýashylyǵy janýarlarymen seleksıalyq-asyl tuqymdyq jumys júrgizýdi birizdendirýge baǵyttalǵan sharalar týraly kelisimder.  Osylardyń qatarynda, EAEO týraly shartqa Qyrǵyz Respýblıkasynyń qosylýyna baılanysty EAEO týraly shartty, Eýrazıalyq ekonomıkalyq odaqtyń quqyǵyna kiretin jekelegen halyqaralyq sharttardy jáne Eýrazıalyq ekonomıkalyq odaq organdarynyń aktilerin qoldanýy jónindegi jaǵdaılar men ótpeli erejeler týraly ratıfıkasıalanatyn zań jobalary bar.

(Májilistiń Baspasóz qyzmeti, 74-63-01. Sýretti túsirgen J.Quspanov).