Búginde «Alashty» “Aq joldan” artyq nasıhattaǵan partıa bar ma!?!. Al ısi qazaqqa “Alashtan” asqan ıdeıa tabyla ma!?!

 

Men búginnen bastap «Aq jol» Demokratıalyq partıasynyń múshesimin.

Búgin, 2020 jyly 14 qyrkúıekte «Aq jol» DP-nyń parlamenttik fraksıasynyń kezekti otyrysynda Májilis depýtattary, partıanyń oblystyq fılıaldarynyń ókilderi meniń qabyldanýymdy biraýyzdan maquldady.

 

Shyny kerek, bul sheshim ońaı bolǵan joq. Elge oralǵan 2013 jyldan beri 7 jyl ótti. Áıtse de «Aq jol» DP-syna kirýime bul saıası uıymnyń ózin qazirgi Qazaq eliniń myzǵymas irgetasyn qalap, shekarasyn belgilep ketken HH ǵasyr basyndaǵy «Alash» partıasynyń murageri dep sóz júzinde ǵana emes, jetekshisi, 1938 jylǵy qandy repressıada Alash ustanymy úshin qurban bolǵan «Alash» qaıratkeri Perýash Kárimulynyń nemeresi Azat Perýashev bastaǵan partıanyń «Alash» ıdeıasyn, qozǵalysyn, partıasyn, ataýlas Ulttyq Jerli Avtonomıasyn jáne «Alash» qaıratkerlerin tıanaqty is-áreketimen, qazaqsha-oryssha maqala-jarıalanymdarymen, ulttyq, halyqaralyq ǵylymı baıqaýlarymen, ǵylymı konferensıalarymen múmkindiginshe shartarapqa nasıhattap kele jatqan ıgi isi túrtki boldy. Búgin «Alash» taqyrybyn «Aq jol»-dan artyq nasıhattaǵan partıa bar ma?!. Al ısi qazaqqa «Alash»-tan asqan ıdeıa tabyla ma?!

 

Bir danyshpannan «oń ózgeristerdi uzaq kútý kerek pe?» dep surapty. Sonda danyshpan: – Eger qol qýsyryp kútseń, ıa, uzaq! – dep jaýap beripti. Uzaq kútýge zaman tarylyp barady. Ǵylymnan bas tartpaı, amalsyz bolsa da saıasatqa aralasqanymda meniń basshylyqqa alatynym Alty Alash kósemi

 

Álıhan Bókeıhannyń myna ósıet sózderi bolmaq:

 

– Bul zamanda jylap muratqa jetemin deý ash túıeniń kúıseýi bolady;

– Bóten kisi qazaqqa eshqaıdan jaqsylyq ákelip bermeıdi. Óz kúshine, óz qýatyna senbegen adam da, halyq ta ǵumyr júzinde báıge almaıdy. Bireýge telmirgen adamnan, halyqtan qosaq túrtken jetim laq baqytty;

– Saıasat isi birlikpen ornyna barady… Bul úlgili saıasat jolynda jurt adamyna bilim-taǵlym jol kórsetetin is, buǵan qazaq jigiti kirse, saıasat jolynan tálim alady, kúnderdiń kúninde qazaq jurtyna kerek bolatyn is atqarady;

– Bizde birlik bolyp, is qyla biletin sheber tabylsa, Alashtyń balasy baqyt jolyna tústi. Keıingi úrim-butaq ne alǵys, ne qarǵys bere júretin aldymyzda zor sharttar bar. Osyny ańǵar, jurtym qazaq!

– Jurt isin tús kórmeı, oıaý júrip izdeý maqsat.

Sultan Han JÚSİP,

«Alash» mádenıet jáne rýhanı damý ınstıtýtynyń dırektory, alashtanýshy ǵalym, fılologıa ǵylymy kandıdaty" dep jazdy jelidegi jazbasynda.