Májilistiń jalpy otyrysynda mádenıet jáne sport mınıstri Aqtoty Raıymqulova mýzykalyq shyǵarmalardy oryndaýshylar fonogram qoldanatynyn kórermenge habarlaýǵa mindetti ekenin atap aıtty.

Mınıstr konsert, oıyn-saýyq is-sharalaryn ótkizý kezinde týyndaıtyn birqatar problemalar bar ekenin atap ótti.

– Oryndaýshylar tarapynan konsertter ótkizý kezinde ádepsiz minez-qulyq kórsetý, sahnada mas kúıinde óner kórsetý úrdisi , josparlanǵan konsertterdi buzý, ádepsiz sózderi bar repertýar tańdaý, kórermenderdi habardar etpeı fonogramny paıdalaný faktileri boldy. Osy oraıda, Zań jobasy aıasynda oryndaýshylardyń osyndaı minez-qulyq kórsetýine jol bermeý úshin birqatar mindettemelerdi engizý arqyly osy máselelerdi retteýge tyrystyq. Olardyń ishinde mańyzdy normalardyń biri – mýzykalyq shyǵarmalardy oryndaýshylardyń fonogramlardy qoldanýy týraly kórermendi habarlaýy. Fonogramlardy paıdalaný tártibi zańǵa táýeldi aktide aıqyndalatyn bolady. Barlyq jarnamalyq ónimderde jáne kasalar janynda mindetti túrde fonogramny paıdalaný boıynsha habarlama beriledi. Bul kórermenge fonogramny paıdalanýmen ótetin konsertke bılet satyp alý nemese odan bas tartý tańdaýyna múmkindik beredi jáne bılettiń qunyna da áser etedi, – deıdi Raıymqulova.

Palata tóraǵasy Nurlan Nyǵmatýlın mádenıet jáne sport mınıstriniń bul usynysyna pikir bildirdi. 

– Menińshe, naǵyz óner ol – aıtys. Aıtysqa fonogrammen shyǵyp kórińizshi. Onda eshqashan, eshqandaı fonogram bolmaıdy. Sol úshin shyǵar, halqymyz osy aıtysty jaqsy kóredi. "Qısyq arba jol buzady" dep halqymyz aıtqandaı, óner árqashan da taza bolýy kerek. Ándi jandy daýysta aıtqan durys. Al fonogram bolsa, onda ony aldyn-ala eskertý qajet jáne bılettiń baǵasy da soǵan sáıkes bolýy tıis. Odan keıin halyq ol konsertke baratynyn ne barmaıtynyn ózi sheshedi. Árıne, konsert jandy daýysta bolsa ánshige halyqtyń baǵasy da, qurmeti de joǵary bolady, – dep atap aıtty májilis tóraǵasy.