Búgin “Aq jol” partıasynyń úgit-nasıhat toby Taldyqorǵan qalasynda boldy. Úgit-nasıhat tobyn aımaqqa partıa lıderi Azat Perýashev ózi bastap bardy.

Partıa belsendileri bul joly «Kaınar-AKB» akýmýlátor zaýytynda bolyp mundaǵy jumysshylardyń oı-pikirin tyńdady.

«Kaınar-AKB» akýmýlátor zaýytynyń óndiristik qýatyn arttyrýǵa áleýeti bar. Alaıda keıbir máseleler zaýyttyń odan ári kúsheıýine toqsaýyl bolyp otyr. Qazir aıyna 340 myń dana akýmýlátor shyǵarýǵa shamasy jetip tur. Al, osy aıda tipti 550 myń dana akýmýlátorǵa tapsyrys kelip túsken. Sondyqtan kásiporyn basshylary qarap otyrmaı óndiristik qýatyn arttyrýǵa tyrysyp-aq jatyr. Daıyn bolǵan qazaqstandyq ónim Reseıge, Qytaıǵa, Ózbekstanǵa, Polshaǵa, Germanıaǵa, Italıaǵa jóneltiledi.

Búgin partıa tóraǵasy Azat Perýashev bul ujymnyń jumysshylarymen jeke pikirlesti. Munda qazir 1200 adam eńbek etip jatyr. Jumysshylrdyń jalaqysy ortasha eseppen 180-220 myń teńge. Alaıda, keshegi lokdaýn kezinde zaýyt eki aıǵa toqtap turdy. Sondyqtan jumysshylardyń kókeıinde taǵy da sol jaǵdaı qaıtalana ma degen kúmándi suraq bar.

Zaýyt basshylaryn alańdatyp otyrǵan basty másele zaýytqa ónimdilikti arttyrý úshin shıkizat jetpeı jatyr. Bul máseleni sheshýdiń eki joly bar. Birinshisi qorǵasyndy Ózbekstannyn ákelý, ekinshisi eldegi taý-ken kásiporyndarynan tikeleı salyp alý. Alaıda, Ózbekstan memleketi qorǵasyndy eksportqa shyǵarýǵa tyıym salǵan. Al, shıkizatty taý-ken kompanıalarynan alý tym qymbat. Otandyq óndirister metaldy London qor bırjasynda belgilengen baǵaǵa satyp alýy qajet. Oǵan tasymal baǵasyn taǵy qosyńyz. “Aq jol” partıasy úkimet osy máseleni nazarǵa alýy qajet degen pikirde.