QR Prezıdenti Nursultan Nazarbaev Qytaı Komýnıstik Partıasy Ortalyq komıtetiniń janyndaǵy Partıalyq mektebine barý kezinde qytaılyq halyqtyń japondyq basqynshylardy jeńýinde qazaqstandyqtardyń úlesi jaıynda aıtyp berdi. Bul týraly «Qamshy» portaly Qazaqparatqa silteme jasaıdy.
Sonymen qatar, Elbasy Qytaı jerinde qaza bolǵan Qazaqstan azamattarynyń erligin máńgi estelik etkenderi úshin QHR úkimetine alǵysyn bildirdi.
Prezıdent Jeńistiń 70 jyldyǵy merekesi Beıjińde toılanǵanyna rızashylyǵyn bildere kele, «Soǵystyń núktesi (Ekinshi dúnıejúzilik soǵys) Qytaıda qoıylǵandyǵy týraly az aıtylady. Qazirgi kezde Kvantýndyq topqa (Japonıanyń áskeri) qarsy soǵysqan keńestik áskerdiń quramynda qazaqtar da bolǵandyǵy anyqtalýda. Qazaqstan ulttyq-azattyq etýshi armıany Almatydan qajetti kómekpen qamtamasyz etti. Qazaqstannan azyq-túlik jetkizilip turdy»,-dedi N. Nazarbaev Partıalyq mekteptiń prorektory He Itınmen kezdesýi kezinde.
Mekteptiń tyńdaýshylary men profesorlyq-oqytýshylyq quramnyń aldynda sóılegen sózinde Elbasy Ekinshi dúnıejúzilik soǵys jyldarynda QHR-daǵy jaýyngerlik áreketterde qazaqstandyqtardyń rólin aıryqsha atap ótti. N. Nazarbaev HH ǵasyrdaǵy surapyl soǵysqa Qazaqstannan attanǵan jaýyngerlerdiń jartysy oralmaǵandyǵyn, olardyń arasynda Qytaı jerinde qaza bolǵandar da bar ekendigin atap ótti.
Memleket basshysy QHR-dyń birqatar qalalaryn azat etý shaıqasynda opat bolǵan sarbazdardyń esimderi osy eldegi Máńgi este saqtaý memorıalynda jazylǵanyn jetkizdi.
«Bul - Jeńistiń, ózin-ózi qurban qylýdyń sımvoly ǵana emes, sonymen qatar, ol ortaq qaterdiń aldynda álem halyqtary birliginiń kórnekti mysaly. Qytaı jerinde qaza bolǵan qazaq sarbazdaryn da máńgi este saqtaǵandaryńyz úshin, barsha otandastarymnyń atynan QHR úkimetine alǵysymdy bildiremin», - dedi QR Prezıdenti.
Osy oraıda Elbasy surapyl soǵysta elderdi jaýdan azat qylýǵa úles qosqan árbir jaýyngerdi árqashan qurmettep, madaqtaý qajet ekenin, sondaı-aq, osyndaı qaıǵynyń qaıtalanýyna jol bermeý - bul barshanyń tarıhı mısıasy ekenin qadap aıtty.
Esterińizge sala keteıik, Ekinshi dúnıejúzilik soǵysta japondyq basqynshylardan Qytaıdy azat etý kezinde qaza bolǵan keńes áskeri men mońǵol sarbazdary Memorıaly (Beıjińnen 245 shaqyrym jerdegi Chjanszákoý ýeziniń Chjanbeı qalasynda) janynda 21 adam jerlengen. Olardyń arasynda Qazaqstannyń týmalary jáne elimizdiń aýmaǵynan soǵysqa shaqyrylǵandar bar.
Eskertkishte 13 mońǵol jáne 66 keńes jaýyngerleriniń aty qashalyp jazylǵan. Olardyń arasynda A. Japarov, T. Ótebaev jáne Á. Berbekov syndy elimizdiń azamattary bar.
