«Nur Otan» partıasy 3 aı ishinde partıalyq baqylaý komısıasynyń 624 otyrysyn ótkizip, onda 1918 másele qaraldy. Olardyń arasynda áleýmettik turǵyn úı berý kezindegi zań buzýshylyqtar, partıalyq etıkany saqtamaý, jataqhanalardyń sapasyz salynýy jáne t.b. kóptegen túıindi máseleler bar. Partıa baspasóz qyzmetiniń málimetinshe, azamattardyń ótinishteri negizinde myńnan astam túrli reıdter de uıymdastyrylǵan.

Máselen, Jezqazǵan qalasynda páterdi zańsyz bergeni úshin birden úsh sheneýnik «Nur Otan» partıasynyń qatarynan shyǵaryldy. Jaqynda ótken prokýrorlyq tekserý kórsetkendeı, toǵyz otbasy «Nurly Jer» baǵdarlamasy boıynsha zańsyz túrde baspanaly bolǵan. Bul jaǵdaıdy Qaraǵandy oblystyq partıalyq baqylaý komısıasy baqylaýǵa aldy. Páter kiltteri qalalyq TKSH basqarmasynyń úsh qyzmetkeriniń dostary men tanystaryna tapsyrylǵany anyqtaldy. Barlyq toǵyz otbasy sot sheshimi boıynsha páterlerdi bosatty. Endi olardyń ornyna baspanaǵa shyn muqtaj adamdar qonystanatyn bolady.

Almatyda partıa músheleri jeke qorǵanysh quraldaryna qatysty medısına qyzmetkerleriniń aıla-sharǵyǵa barýy múmkin jaǵdaıdyń jolyn kesti. Buǵan deıin qoǵam belsendileri №4 qalalyq jedel járdem bóliminen esepke alynbaǵan obaǵa qarsy jıyntyqtar, qorǵanys ekrandary, bir rettik kózildirikter saqtalǵan qoımany tapqan edi. Qoımadan tabylǵandardyń barlyǵy gýmanıtarlyq kómek aıasynda kelgen. Bul jaǵdaıdy «Nur Otan» partıasynyń qalalyq fılıaly jedel baqylaýǵa aldy.

«Anyqtalǵan zań buzýshylyq faktisi boıynsha Almaty qalasynyń Jedel medısınalyq kómek qyzmetiniń basshylyǵyna tártiptik keńes ótkizý usynyldy», - dep atap ótti partıalyq baqylaý komıtetiniń tóraǵasy Artýr Platonov.

Al Aqtóbe qalasyndaǵy jataqhanalardyń biriniń turǵyndary 45 mln teńge jumsalyp júrgizilgen kúrdeli jóndeýden keıin de ǵımarattyń qulaýǵa jaqyn turǵanyna shaǵymdandy. Buǵan jaýap retinde merdiger kompanıa PIK tóraǵasy men turǵyndardyń birazy qabyldaý aktisine qol qoıǵanyn jáne ol kezde eshqandaı kemshilikterdi baıqamaǵanyn alǵa tartty. Bul máselege qalalyq partıalyq baqylaý komısıasy aralasty. Sonymen, úıge júrgizilgen tekserý jumystary káriz qubyrlary men jýynatyn bólmelerde olqylyqtar bar ekenin kórsetti. Nurotandyqtar Aqtóbe ákimdigine barlyq anyqtalǵan kemshilikterdi joıýǵa jáne aqaýlarǵa qatysty aktini 10 sáýirge deıin usynýǵa keńes berdi.

Qyzylordada oblystyq máslıhat depýtaty Baqdáýlet Maqashov saltanatty is-shara ótkizgen. Sanıtarlyq-epıdemıologıalyq talaptardyń buzylýyna qatysty «Nur Otan» partıasy jedel áreket etip, ony Qyzylorda oblystyq partıalyq baqylaý komısıasynyń tóraǵasy qyzmetinen bosatty.

Partıanyń baspasóz qyzmetinde atap ótkendeı, ótken jyly Partıalyq baqylaý komıteti men komısıalary jeke jáne zańdy tulǵalardyń 1150 ótinishin qaraǵan. 100-den astam rezonanstyq másele oń sheshimin tapty, ortalyq jáne jergilikti atqarýshy organdarǵa 220-dan astam usynym engizdi.

2020 jyly partıalyq jaýapkershilikke 400-den astam adam tartylsa, olardyń qatarynda birqatar vıse-mınıstrler, oblys ákimderiniń orynbasarlary, máslıhattardaǵy fraksıalar basshylary jáne t.b. bar. Olardyń ishinde túrli zań buzýshylyqtarǵa jol bergeni úshin 100-den astam adam partıadan shyǵaryldy.