QR parlamenti májilisiniń depýtaty Rozaqul Halmuradov 2016-2018 jyldarǵa arnalǵan búdjettik josparlaý týraly prezentasıa barysynda EKSPO-2017 kórmesine 2018 jyly bólinetin 35 mıllıardqa qatysty narazylyq bildirgen. Bul týraly «Qamshy» portaly today.kz-ke silteme jasaı otyryp habarlaıdy.

Jaqynda QR Qarjy mınıstri Baqyt Sultanov parlament qabyrǵasynda 2016-2018 jyldardaǵy búdjettik josparlaý týraly prezentasıa jasaǵan bolatyn. Onda EKSPO-2017 kórmesine 2018 jyly 35 mıllıard teńge bólinetindigi aıtylǵan.

Rozaqul Halmuradov, Májilis depýtaty:

-Sizdiń aldyńǵy baıandamalaryńyzda EKSPO– 2017 kórmesine 2016 jyly memlekettik búdjetten 173 mıllıard teńge bólinedi delingen. Al 2017 jyly atalmysh kórmege 98 mıllıard teńge qarastyrylǵan. Memleket basshysynyń tapsyrmasy boıynsha halyqaralyq kórmeniń qurylys jumystary 2016 jyly aıaqtalýy tıis. Endeshe 2018 jyly ne úshin 35 mıllıard teńge bólýdi josparlap otyrsyzdar? Buǵan ne sebep? Sonda bul jymqyrylǵan qarjynyń ornyn toltyrý ma? Eger 2017 jyly kórme ótetin bolsa, jyl aıaǵynda aıaqtalady degen sóz. Ondaı bolsa qosymsha 35 mıllıard teńge ne úshin bólinbek?

Al depýtattyń suraǵyna jaýap berýge tyrysqan qarjy mınıstri EKSPO–2017 kórmesiniń mańyzy týraly sóz ete otyryp, 2018 jyly bólinetin qarjylar pavılondardy ázirleýge jumsalady dep túsindirgen.

«Bul bir jylǵa arnalǵan joba emes. Ózderińiz kórip otyrǵandaı kelesi jyly 173 mıllıard teńge negizgi qurylysty aıaqtaýǵa jumsalady. Al 2017-2018 jyldary qosymsha jumystar, pavılondardy ázirleý sıaqty mańyzdy jumystarǵa da qarajat kerek. Qurylys aıaqtalǵannan keıin de jasalatyn jumystar bar ekenin umytpańyzdar»,-deıdi QR Qarjy mınıstri Baqyt Sultanov.

Kóp jaǵdaıda búdjette qarastyrylǵan qarjylardyń joǵaryda atalǵan jumystarǵa tıisti saraptaýlardyń qorytyndylarymen josparlanbaı, bılik ókilderiniń nemese depýtattarynyń bedeli men belsendiliginiń nátıjesinde, dáıeksiz kórsetkishterge oraı  bólinetinin teriske shyǵarýǵa bolmaıdy.

35 mıllıardtyń jyry men syry uzaq ýaqytqa deıin aıtylatyny túsinikti. Búdjet qarjysyn maı shelpekteı shúıirkelep jatqandarǵa qashan tosqaýyl bolady degen jaýyr bolǵan suraq taǵy da oıǵa oralady.

Kúshti men tistini ǵana tanıtyn qatygez naryqqa qarjylyq qıyndyq  «basqan izi syqyrlaı» tónip kelgende keń tusaý tirlikke úırengen halyq qarjyny únemdýi tıis emes p e edi?! Memleket basshysynyń ózi bas bolyp únemdeý saıasatyn  qolǵa alǵany qaıda qaldy? Barymyz ben baǵlanymyzdy kórsetetin memlekettiń bas toıy – Qazaq handyǵynyń 550 jyldyǵyna da qarjy bólýde biraz ábigerge salynǵan edi. Tipti Qazaq handyǵynyń serıalyna da qarjy jetkiliksiz degen syltaýmen túsirilim jumystary toqtap qalǵan edi. Al bılik ókilderiniń ózderi halyqtan jylý jınaǵanda betteri búlk etpegen edi. Al EKSPO-2017 jyly ótetin halyqaralyq kórmege memleket qarjysynan 173 mıllıard, keıin 98 mılııard teńge  qosymsha bólinetinine de myńq etpedik. Al 2018 jyly kórme aıaqtalǵannan keıin de EKSPO-ǵa dep 35 mıllıard teńge bólýdi qalaı túsinýge bolady? Depýtat Rozaqul Halmuradovtyń sózderiniń jany bar ekeni sózsiz. Depýtat myrza «2018 jyly ne úshin 35 mıllıard teńge bólýdi josparlap otyrsyzdar? Buǵan ne sebep? Sonda bul jymqyrylǵan qarjynyń ornyn toltyrý ma?» degen bolatyn. Iá, ne bolsa da bólingen qarajat ıgerilmeıtin bolsa, birinshi basshylar jaýapqa tartylatyny túsinikti. Al mınıstrliktegiler men Ulttyq kompanıa basshylary buǵan jol bermeýdiń barlyq amal sharǵylaryn jasap baǵatyny da ras. Depýtat narazylyq tanytyp baqqanymen, mınıstr myrs etpedi de. Iá, osy jerde taǵy da parlamenttiń pármensizdigin aıta ketý jón bolar. Sonda qalaı jumsaýdy jón dep tapsa, solaı jumsaı beretindeı búdjet bıliktiń qaltasyndaǵy qarajat pa? Túsiniksiz...

Nurgeldi Ábdiǵanıuly