Keshe  bir dollardyń 300 teńgege deıin qymbattaýyn ońtaıly paıdalanǵysy kelgen belgisiz top Whatsapp jelisi arqyly «Altynnyń» naryqqa engendigi týraly aqparat taratqan. Sonymen qatar, jalǵan aqparat taratýshylar habarlamada jurtty dollardy teńgege aıyrbastaýǵa úgittegen. Bul týraly «Qamshy» portaly Astana arnasyna silteme jasaı otyryp habarlaıdy.Ulttyq bank Eýrazıalyq ekonomıkalyq odaq aıasynda biryńǵaı valútanyń qoldanysqa shyqqany týraly áleýmettik jelilerde taraǵan aqparatty joqqa shyǵardy .

 Belgili bolǵandaı sýrette oıdan shyǵarylǵan valúta úlgileri beınelengen.

Al, Ulttyq banktegiler biryńǵaı valúta shyǵarý úshin kóptegen halyqaralyq kelisimder jasasý qajet, qazir ondaı kelissózder júrgizilip jatqan joq ekenin aıtyp, áleýmettik jelilerdegi aqparat shyndyqqa janaspaıdy dep qysqa qaıyrdy. Teńgeniń kúnnen kúnge quny túsken kezeńde belgili bir múddesi bar toptar halyqty arandatýshylyqqa jeteleýi múmkin. Sondyqtan, resmı aqparat kózderiniń derekterine nazar salyńyzdar.