Baýyrjan Baıbek – Janbolat Mamaı sot prosesinde Mamaı Baıbek talap aryzynda turǵylyqty mekenjaıy retinde óziniń naqty turatyn úıiniń mekenjaıyn emes, NurOtan partıasy keńsesiniń mekenjaıyn kórsetkenin aıtty.

Belsendi munyń sebebin Baýyrjan Baıbektiń záýlim saraıda turatynymen, ony kórsete almaıtynymen túsindirdi.

J.Mamaı sondaı-aq B.Baıbek óziniń bıznesin otbasy múshelerine – qaryndasy, ata-anasynyń atyna jazyp qoıǵanyn, ol kásipkerlik nysandar memlekettik tapsyrysty oryndap otyrǵanyn atap ótti.

Osy sátte sýdıa belsendiniń sózin bólip, Mamaıdyń aıtyp jatqandary daý taqyrybyna sáıkes kelmeıtinine nazar aýdaryp, Baıbektiń talap aryzyndaǵy naqty máseleler boıynsha sóıleýge shaqyrdy. Mamaı bolsa, aıtyp jatqandary óziniń buǵan deıingi aıyptaýlaryn dáleldeýge tikeleı baılanysty ekenin, taqyryptan aýytqymaǵanyn jetkizip, sonymen qatar sýdıa Baıbek ókiliniń sózin bólmeı, ózin qaıta-qaıta toqtata bergenine narazylyq bildirdi.

Munan soń belsendi Baıbektiń týystarynyń kásibi týraly jalǵastyryp, Aıgúl Baıbek (Baýyrjan Baıbektiń ápkesi) quryltaıshylyq etetin "Aray Media Group" kompanıasy "Dos-Muqasan" toby týraly fılm túsirý úshin kınony damytý qorynan eki kelisim-shart boıynsha 425 mıllıon teńge qarjy alǵanyn jemqorlyq áreket dep ataıdy.

Baıbektiń ókili bul qarajat eki kelisim-shart emes, bir kelisim-shart aıasynda ekige bólinip berilgenin málim etti.

Munan soń Janbolat Mamaı Qazaq ulttyq ýnıversıtetine tıesili jerlerdiń satylýyna, Kókjaılaýdaǵy aǵashtardyń zańsyz otalýyna Baýyrjan Baıbektiń qatysy bary týraly aıtyp, alǵashqy másele boıynsha jer máseleleri jónindegi zańger Baqytjan Bazarbek arnaıy saraptama ázirlep jatqanyn, ekinshi máselege qatysty jýrnalıs Vadım Boreıkony kezekti sot otyrystaryna kýá retinde shaqyrý týraly jazbasha ótinish túsirgenin málim etti.

Sondaı-aq ol Baýyrjan Baıbek Almaty qalasyn basqaryp turǵan shaqta Qytaıdan avtobýs satyp alý isinde jemqorlyq áreketterge jol berilgenin, ol boıynsha qylmystyq is qozǵalǵanyn, buǵan eks-ákimniń qatysy baryn aıtty.

Al Baýyrjan Baıbektiń múddesin qorǵap jatqan zańger Aıjan Táshenova erli-zaıyptylardyń sózi men isi ómirde qabyspaıtynyn J.Mamaı ár sózinde eýropalyq jáne halyqaralyq standarttardy mysalǵa keltiretini, sóz bostandyǵy, zań ústemdigi týraly jıi aıtatyny jaı ǵana betperde ekenin aıtqan.