Keshe Atyraýda ótken jıynda elbasy «Qazaqstanda jasalǵan» degen markaǵa nazar aýdarý kerektigin esketti. Atyraý, Aqtóbe, Mańǵystaý, Batys Qazaqstan oblystarynyń ákimderine jeńil ónerkásipti damytýǵa keńes berdi. Prezıdent qazaqstandyq kıimderdiń sheteldikinen esh kem túspeıtinin tilge tıek etti. Sonymen qatar, otandyq kıimdi Investısıalar jáne damý mınıstri Áset Isekeshev kıip júretinin ózgelerge úlgi etip kórstti. Shynynda da bizdiń saıdyń tasyndaı etip saılap qoıǵan qalaýlylarymyz ben mınıstrliktegilerdiń baralyǵy elimizde tigilgen kıim kıetin bolsa, qazaqstandyq brend jasap shyǵýǵa bolady. Kásiptiń eń negizgi qozǵaýshy kúshi-jarnama. Óz sózinde Nazarbaev: «qazaqsandyq ónimderiń jarnamashysymyn»,-dep aıtyp ótti. Endi osy tusta, Nazarbaev Otanymyzda tigilgen kıimdi ǵana kıedi eken dep barlyǵy qazaqstandyq ónimdi qoldaýǵa kirisip kete me? Álbette joq. Sebebi bizdiń halyqty tolyqtaı kıimmen qamtamasyz ete alatyn ulttyq brend áli qalyptaspaǵan. Tek, ishinara ulttyq brendke berilgen adamdar ózderi izdep taýyp júrgen ımıji qalyptaspaǵan kásiporyndar ǵana bar. Onyń úsine ulttyq ónim degende biz eń negizgi máseleni ajyratyp alýǵa tıispiz. Mata Týrsıadan shyǵyp, kıim osy jerde tigilse, ol qazaqstandyq pa, álede túrikterdiń ónimi bola ma? Árıne Qazaqstandiki bolady. Sebebi, ol ózge elde jaı ǵana mata bolǵan, al bizdiń elde dızaıny qalyptasqan káp-kádimgi kıimge aınaldy. Biraq biz ony tutynýshyǵa usynǵanda kıimniń tigilgen otanyn emes, matasynyń shyqqan jerin ataǵandy qup kóremiz. Sebebi tutyný psıhologıasy solaı qalyptasqan. Týrsıa dese alýǵa bolady. Qazaqstan dese, keýdemizge kúmán men senimsizdik ornaıdy. Alaıda, kıim óndiretin kásiporyn elbasy mysalǵa keltirgendeı, Prezıdentke kıim tikkenin jarnama retinde paıdalansa, jaǵdaı ózgerýi bek múmkin. Anyǵynda qazaqstandyq ónimdi tutynýǵa el turǵyndarynyń eshqaısysy qarsy emes. «Qazaqstanda jasalǵan» degen kıimdi maqtanyshpen kıip júrgimiz keledi. Bizdiń de Prezıdentimiz sekildi maqtanyp otyrǵymyz –aq keledi. Biraq qaıdan, qalaı alýǵa bolatynyn biz bilmeımiz. Jeńil ónerkásip ıelerine qoldaý qajet. Ásirese, ulttyq ónimimizdi jarnamalaýǵa bılik turǵysynan múdde qajet. Aldymen matany syrttan tasyp, odan soń ózimizde óndirýge áreket jasaý lázim. Kıim ónerkásibin damytý úshin matany bylaı ysyrǵanda, jip pen ınege deıin ózimizden shyqqany durys. Jipti bir elden, ıneni taǵy bir shetelden, matany muhıttyń arǵy jaǵynan tasyǵan kıim ónerkásibiniń ne mánisi bar?
Aınur Tóleý
