Petropavlda Soltústik Qazaqstan oblysy qarjy polısıasynyń birinshi orynbasary Jandos Ahmetov óz úıiniń kire berisinde  qylmyskerdiń qolynan qaza boldy.

Onyń jansyz denesi keshki 20:00 shamasynda úıiniń kireberisinen tabyldy, dep habarlaıdy  Today.kz. Aldyn ala boljam boıynsha, Jandos Ahmetovke birneshe ret oq atylǵan.

Máıit tabylǵan jer qazir qorshaýǵa alyndy. Oqıǵa ornynda quqyq qorǵaýshylar jumys isteýde.

Atalmysh oqıǵa boıynsha, Soltústik Qazaqstan oblysy İİM   QR Qylmystyq Kodeksiniń 96 babyna (adam óltirgeni úshin) súıenip, istiń barlyq nusqalary qaralyp, tekserilýde. Habarlamada: "Ahmetovtyń ólimi onyń iskerlik qyzmeine baılanysty degen tujyrymdy joqqa shyǵarmaımyz" delingen.

Jandos Ahmetov qarjy polısıasynyń organdarynda 2012 jyldyń mamyr aıynan bastap qyzmet atqaryp kelgen.