Máskeýde ótken memleket basshylary otyrysynda Eýrazıalyq ekonomıkalyq odaq týraly shart jobasymen, Armenıa Respýblıkasynyń Keden odaǵy men Biryńǵaı ekonomıkalyq keńistikke qosylýynyń jol kartasymen jumys barysy, sondaı-aq ekonomıkalyq ıntegrasıanyń birqatar basqa da aǵymdaǵy máseleleri qaraldy, dep habarlaıdy Bnews aqparattyq qyzmeti.

Nursultan Nazarbaev jyl sońynda kezdesip, eýrazıalyq ıntegrasıalyq úderister aıasynda atqarylǵan jumys qorytyndysyn shyǵarýdyń ıgi dástúrge aınalǵanyn atap ótti.

 – Ótip bara jatqan jyl kezdesýlerge toly boldy, sonyń arqasynda biz ózimizdiń ortaq ıntegrasıalyq isimizdi tabysty ilgeriletýdemiz. Endi bir aptadan soń biz 2014 jyldy – óte mańyzdy jyldy qarsy alamyz. Biz kelesi jyly Eýrazıalyq ekonomıkalyq odaq týraly shartqa qol qoıý mindetin alǵa qoıdyq jáne ony iske asyrýǵa maqsatty túrde qadam basyp kelemiz, – dedi Memleket basshysy. Sonymen qatar, Qazaqstan Prezıdenti Mınskidegi qazan aıyndaǵy ýaǵdalastyqtarǵa qaramastan, Eýrazıalyq ekonomıkalyq odaq týraly shart jobasynyń ınstıtýttyq ta, fýnksıonaldyq ta bóligi boıynsha kelise almaýshylyq áli de saqtalyp otyrǵanyn aıtty. – Ókinishke qaraı, Sharttyń jekelegen baptarynyń mátinderin ózgertý, olardy qaraýda taraptar sarapshylarynyń asyǵys rejimde jumys júrgizýi jáne t.b. jaıttar kezdesti. Osynyń bári Sharttyń jobasyn qol qoıý úshin daıyndaý merzimin uzarta túsýde. Qujattarmen jumysty aqtaý úshin barlyq kúshti salý kerek. Máselen, sarapshylar áli kúnge deıin biryńǵaı termınologıalyq sózdik qalyptastyrǵan joq. Sharttyń saıasatqa qatysty «biryńǵaı», «kelisilgen», «úılestirilgen» tárizdi negizgi termınderi týraly ortaq túsinistik joq. Ázirge sarapshylar termınologıa jóninde kelisimge kele almaı jatqanda, búkil Shart týraly sóz bolýy múmkin emes. Tym táptishteý men bul máseleler jónindegi pikirtalasqa urynbas úshin bizdiń Úkimetterimizge, EEK Keńesine jáne syrtqy saıasat vedomstvolaryna Shart boıynsha kelisimdi kelesi jylǵy naýryzǵa deıin qamtamasyz etýdi tapsyrýdy usynamyn, – dedi Nursultan Nazarbaev. Memleket basshysy aldymen ıntegrasıa úshin irgetas daıyndap alyp, ózara yqpaldastyqtyń tereńirek túrlerine sodan keıin ótý qajettigin eskere otyryp, kezeńdilik qaǵıdasyn saqtaýǵa nazar aýdardy. – Osyǵan baılanysty qazirgi kezeńde úılestirilgen nemese kelisilgen saıasatqa, barlyq qatysýshylardy qyzyqtyratyn salalarda ortaq naryq qalyptastyrýǵa den qoıǵan paıdalyraq bolar edi. Saýda saıasaty biz biryńǵaı saıasatqa qol jetkizgen baǵyttarda, mysaly, úshinshi elderge qatysty, sóz joq, saqtalýǵa tıis. Al biraq basqa salalarda «biryńǵaı saıasat» jáne «biryńǵaı naryq» túsinikterin qoldanýdyń túgel qamtıtyn sıpatyna nazar aýdarý artyq dep sanaımyn, – dedi Nursultan Nazarbaev. Qazaqstan Prezıdenti qurylyp jatqan Odaqty saıasılandyrýǵa jol bermeý qajettigine erekshe toqtaldy. – Biz ekonomıkalyq odaq qurýdamyz. Sondyqtan Komısıanyń mindeti – Shartqa ekonomıkalyq ıntegrasıa sheginen shyǵatyn erejelerdi qospaý. Shekarany qorǵaý, kóshi-qon saıasaty, qorǵanys jáne qaýipsizdik júıesi tárizdi baǵyttar, sondaı-aq densaýlyq saqtaý, bilim berý, ǵylym, mádenıet, azamattyq, qylmystyq jáne ákimshilik ister boıynsha quqyqtyq kómek máseleleri ekonomıkalyq ıntegrasıaǵa jatpaıdy jáne Ekonomıkalyq Odaq formatyna kóshirilýi múmkin emes. Bul máseleniń barlyǵy UQSHU, TMD aıasyndaǵy kóptarapty kelisimder formatynda da, ekijaqty formatta da jaqsy rettelgen. Qylmystyq jáne ákimshilik tártip buzýshylyqtar jónindegi jaýapkershilikti birizdendirý týraly másele kóterilýde, alaıda bul salalar taza ulttyq salalar, memlekettiń ishki saıasatynyń máni bolyp sanalady jáne júıelengen sharttan alynyp tastalýǵa tıis, – dedi Memleket basshysy. Buǵan qosa, Nursultan Nazarbaev memleketter basshylary jáne úkimetter deńgeıindegi Joǵary keńeske ultústilik ókilettikterdi berýge bolmaıtynyn atap ótti. – Komısıa – ultústilik organ. Biz ıntegrasıany ilgeriletý úshin osyǵan bardyq. Onyń ókilettigi qol qoıylǵan sharttarmen jáne kelisimdermen naqty retteledi ári tek qana ekonomıkalyq salaǵa jatady. Biz Sizdermen birge, memleketter basshylary retinde, Komısıa múshelerin taǵaıyndaımyz, bizdiń sheshimimiz strategıalyq jáne uıymdastyrýshylyq sıpatqa ıe. Biz tapsyrmalar beremiz, Komısıanyń is-qımylyn maquldaımyz jáne sharttarǵa qol qoıamyz. Komısıa olardy oryndaıdy, sebebi ol – Joǵary organnyń tapsyrmasy. Osy qurylymdy saqtaý qajet, – dedi Qazaqstan Prezıdenti. Memleket basshysy Odaq týraly shart oǵan múshe memleketterdiń ózge elder men uıymdarmen aradaǵy halyqaralyq sharttaryna nuqsan keltirmeýi tıistigin atap ótti. Sondaı-aq, Qazaqstan Prezıdenti Komısıanyń jumysynyń budan da tıimdi jolǵa qoıylýyna, EEK departamentterinde bizdiń azamattarymyzdyń teńdeı ókildik etýi máselelesiniń sheshilýine nazar aýdardy. – Únemi talqylyp júrgen taǵy bir másele – Komısıaǵa jańa ókilettikter berý. Qazir EEK ókilettigin asa keńeıtýdiń qajettiligi joq. Bul jóninde biz mamyr aıynda Astanada da, qazan aıynda Mınskide de sóıleskenbiz. Áıtkenmen, Shart jobasymen jumys barysynda Komısıanyń kóptegen sátterde ózine qosymsha ókilettikter alǵysy keletin baıqalady. Komısıa qyzmetin baǵalaý tetikteri týraly másele qoıý áldeqaıda paıdalyraq bolar edi dep oılaımyn. Qazaqstan men Reseıde memlekettik organdardy baǵalaý júıesi engizilgen. Solardyń negizinde ortaq ádister ázirlep, ony Komısıa qyzmetin baǵalaýǵa qoldanýǵa bolady, – dep atap ótti Nursultan Nazarbaev. Sondaı-aq Memleket basshysy qabyldanatyn sheshimderge Alqa músheleriniń jeke jaýapkershiligin bekitýdi usyndy. Bul halyqaralyq sheneýnikterdi ár qadamyn salmaqtap, kez kelgen máselege obektıvti qaraýǵa májbúr etedi. – Bul normalardy Shart jobasyna qazirden-aq qosý kerek nemese úkimetterge birlesip jeke qujat ázirleýdi jáne ony kezekti otyrysymyzǵa usynýdy tapsyrý qajet. Jalpy alǵanda, Qazaqstannyń berik, kúshti ári túrli ózgeristerge ıkemdi Ekonomıkalyq odaq qurýǵa beıildi ekenin taǵy bir ret qýattaımyn. Mundaı odaq oǵan qatysýshylardyń barlyǵynyń múddelerin eskergende ǵana qalyptasýy múmkin. Sarapshylar biraz jumys atqardy, endi aıtylǵan eskertýlerdi eskere otyryp, birlesken qyzmetti jalǵastyrý qajet, – dedi Qazaqstan Prezıdenti. Sońynda Nursultan Nazarbaev Eýrazıalyq ekonomıkalyq odaq týraly Shartty mamyrda qol qoıýǵa ázirleý sıaqty aýqymdy mindet qoıylyp otyrǵandyqtan, kelesi jyly jumystardyń budan az bolmaıtynyn atap ótti. Qazaqstan qýatty Ekonomıkalyq odaq qurýǵa beıildi – N.Nazarbaev