Nursultan Nazarbaev ómiriniń sońǵy jyldary ózi synaǵan kúıeýbalasy, Avstrıa túrmesinde asylǵan kúıi tabylǵan Rahat Álıev pen sheteldegi oppozısıoner Muhtar Áblázovty joǵary laýazymǵa taǵaıyndaý qatelik bolǵanyn aıtty. Bulaı dep ol amerıkalyq rejıser Olıver Stoýn túsirgen "Qazaq: history of the golden man" atty derekti fılmde málimdedi.

– Qarjy polısıasy onyń qaramaǵynda edi. Osyny paıdalanyp, ózgelerdiń bıznesi men aqshasyn tartyp ala bastady. Bir ýaqytta oǵan: "Toqta" dep eskertý jasadym. Ol kezde meniń kúıeý balam, úsh kishkentaı nemeremniń ákesi boldy. Qyzym úsh nemerem men onyń ákesi maǵan keldi. "Men ne isteı alamyn? Ol – qylmysker" dep jaýap berdim", – dedi Nazarbaev.

Ol bul jaǵdaı ózine óte aýyr soqqanyn, qyzy Darıǵany túsinetinin jáne aıaıtynyn jetkizdi.

Al Ablázovty mıllıardtaǵan aqsha jymqyrdy dep aıyptady.

– 1991 jyldy alyp qarasańyz, Keńes Odaǵy ydyrady, bári jalǵyz qaldy. Men qyzmettes bolǵandardyń bári burynǵy komýnıser edi. Biraq arasynda ýnıversıtet bitirgen, naryqtyq ekonomıka, kapıtalızmnen habary barlar kezdesti. Burynǵy tájirıbesi kedergi keltirmes úshin men 30-32 jyl buryn olardy qyzmetke taǵaıyndaı bastadym. 

Jáne bul qatelik boldy. Olar memlekettiń azyn-aýlaq aqshasyn, kerisinshe, jymqyra bastady. Kóbi jemqorlyqpen ustaldy. Ablázovty London soty halyqaralyq alaıaq dep tanyp, sottady. Men oǵan keshirim jasadym", – dedi ol.