G7 elderi – Ulybrıtanıa, Kanada, Fransıa, Germanıa, Italıa, Japonıa jáne AQSH Aýǵanstannan halyqaralyq kúshterdi evakýasıalaý kúnin talqylap, Baıdendi evakýasıanyń aıaqtalý kúnin uzartýǵa kóndirgisi keldi. Ulybrıtanıa premer-mınıstri Borıs Djonson Fransıa prezıdenti Emmanýel Makron, Germanıa kansleri Angela Merkelmen birge evakýasıa merzimin uzartý kerek ekenin aıtty. Biraq, AQSH prezıdenti olardyń ótinishin toıtaryp, óz sheshimin "terorıstik shabýyl qaýpiniń artýymen" baılanystyrdy.

Djo Baıden amerıkalyq kúshterdi Aýǵanstannan evakýasıalaýdyń 31 tamyzǵa deıin jalǵasatynyn málimdedi. Degenmen, operasıa Talıbannyń yntymaqtastyǵyna baılanysty shartty jaǵdaıda tabysty júzege asatynyn aıtty.

– Biz evakýasıany 31 tamyzǵa deıin aıaqtaımyz dep otyrmyz. Neǵurlym tezirek aıaqtasaq, soǵurlym jaqsy. Ár bir artyq operasıa kúni bizdiń áskerge qosymsha qaýip ákeledi. Biraq evakýasıanyń 31 tamyzǵa deıin aıaqtalýy tálipterdiń ózara sáıkesýiniń jalǵasýyna baılanysty, sonymen qatar biz alyp ketetin adamdardyń áýejaıǵa kirýine ruqsat berýi tıis jáne qyzmetimizge kedergi keltirmeýi kerek, – dedi Baıden.

Baıden Pentagon men Memlekettik departamentke qajet bolǵan jaǵdaıda evakýasıa kestesin ózgertýdi suraǵanyn aıtty.

AQSH prezıdenti buǵan deıin Birikken Ulttar Uıymy, Eýropalyq Odaq jáne NATO-daǵy áriptesterimen kezdeskenin málimdegen.

Fransıa evakýasıany aıaqtaý úshin kóbirek ýaqyt qajet ekenin aıtyp, merzim taıaǵan saıyn alańdaýshylyq bildirgen. Germanıa syrtqy ister mınıstri Heıko Maas NATO odaqtastarymen jáne Talıbanmen Kabýl áýejaıyn belgilengen merzimnen keıin de ashyq ustaýdy talqylap jatqanyn aıtqan. Ulybrıtaná premer-mınıstri Borıs Djonson G7 samıtinde AQSH áskerleriniń Aýǵanstanda qalý merzimin uzartýdy suraıtynyn málimdegen jáne AQSH prezıdenti Djo Baıden evakýasıa merzimin uzartatyn sheshim shyǵarady dep kútilgen bolatyn.

Keıinirek, Baıdenniń eń joǵary tyńshysyn Talıbanmen kelissióz júrgizýge jibergeni habarlanyp, kelissózdiń "soǵys jaǵdaıynda" ótkeni aıtylǵan. Al, Talıban qozǵalysynyń ókili evakýasıalaý merzimin uzartýǵa qarsy ekenin jarıalap, onyń "aýyr saldary" bolatynyn aıtqan.