Pedagogıka jáne medısına baǵyttarynda oqıtyn joǵary oqý oryndary stýdentteriniń shákirtaqysy ósti, dep habarlady KazTag aqparat agenttigi.

3 qyrkúıektegi úkimet qaýlysy boıynsha memlekettik stıpendıa mólsheri, ony taǵaıyndaý jáne tóleý erejelerine ózgerister engizilgen.

"Nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan "Eńbek" memlekettik baǵdarlamasynyń birinshi baǵyty aıasynda bilim alýshylarǵa memlekettik stıpendıa aralyq atestattaýdyń (emtıhan sesıasynyń) nátıjelerine qaramastan tólenedi" dep málimdedi.

Birinshi akademıalyq kezeńge stıpendıa memlekettik tapsyrys boıynsha birinshi kýrsqa (birinshi oqý jylyna) qabyldanǵan barlyq stýdent pen magıstrantqa taǵaıyndalyp, 1 qyrkúıekten bastap birinshi akademıalyq kezeń men kanıkýl aıaqtalǵanǵa deıin aı saıyn tólenedi.

Memlekettik bilim berý tapsyrysy boıynsha oqıtyndarǵa tólenetin aı saıynǵy stıpendıanyń mólsheri:

• daıarlaýdyń pedagogıkalyq baǵyttarynda jáne "Densaýlyq saqtaý" baǵyty boıynsha oqıtyn stýdentterdi qospaǵanda, joǵary bilim berý baǵdarlamalaryn iske asyratyn bilim uıymdarynda oqıtyn stýdentterge – 31 423 teńge;
• joǵary bilim berý baǵdarlamalaryn iske asyratyn bilim uıymdarynda daıarlaýdyń pedagogıkalyq baǵyttarynda oqıtyn stýdentterge – 50 400 teńge;
• joǵary bilim berý baǵdarlamalaryn iske asyratyn bilim uıymdarynda daıarlaýdyń "Densaýlyq saqtaý" baǵyty boıynsha oqıtyn stýdentterge – 50 400 teńge;
• ınternderge – 59 289 teńge;
• magıstranttarǵa – 76 950 teńge;
• "Nazarbaev ýnıversıteti" derbes bilim berý uıymynda oqıtyn magıstranttarǵa – 143 750 teńge;
• doktoranttarǵa – 172 500 teńge;
• daıarlaýdyń "Densaýlyq saqtaý" baǵyty boıynsha doktoranttarǵa – 172 500 teńge;
• daıarlaýdyń "Densaýlyq saqtaý" baǵyty boıynsha dáriger-rezıdentterge jáne magıstranttarǵa – 88 494 teńge;
• memlekettik organdardan oqýǵa jiberilgen Qazaqstan Joǵarǵy sotynyń janyndaǵy Sot tóreligi akademıasynyń magıstranttaryna sońǵy jumys orny boıynsha laýazymdyq eńbekaqysynyń, biraq memlekettik bilim berý tapsyrysy boıynsha bilim alatyn magıstranttar úshin belgilengen memlekettik stıpendıadan tómen emes deńgeıde;
• tehnıkalyq jáne kásiptik bilim berý baǵdarlamalaryn iske asyratyn bilim berý uıymdarynda jumysshy biliktilikteri boıynsha oqıtyn stýdentterge – 21 787 teńge;
• tehnıkalyq jáne kásiptik (orta býyn mamandaryn daıarlaýdy kózdeıtin), orta bilimnen keıingi bilimniń bilim berý baǵdarlamalaryn iske asyratyn bilim uıymdarynda oqıtyn stýdentterdiń memlekettik stıpendıasy – 20 948 teńge mólsherinde belgilenedi.

"Aral óńirindegi ekologıalyq qasiret saldarynan zardap shekken azamattardy áleýmettik qorǵaý týraly" zańǵa sáıkes, ekologıalyq apat aımaǵynda turatyn bilim alýshylarǵa stıpendıa tóleý ekologıalyq jaǵynan qolaısyz jaǵdaıda turǵany úshin koefısıent qoldanyla otyryp belgilenedi.

Qaýly birqatar normany qospaǵanda, alǵashqy resmı jarıalanǵan kúnnen keıin kúntizbelik on kún ótken soń qoldanysqa engiziledi.